Inuusuttut inatsisartui piareerluinnalerput

Inuusuttut Inatsisartui aqagu ataatsimiillutik aallartittussat piareerluinnalerput. Inuusuttut sinerissami ilinniarfinnit assigiinngitsuneersut 31-it Nuummut tikissimalereerput, ullumilu katersuupput, inatsisartut ataatsimiittarfianni aqagumiit sisamanngornermut pisussat eqqartoqatigiissutigissallugit.
Allattoq Najaaraq Egede
februaarip 15-at 2009 13:28

Inuusuttut inatsisartuisa ilaatigut elektronikki atorlugu taasisarneq, allanik taasissussisannginnissamik maleruaqqusat, ilinniassavaat. Inatsisartuinni ukiarmi maleruaqqusanik ilinniartitsisoqaraluarpoq, tusareerparpulli arlalinnit unioqqutinneqarsimasoq.

Inuusuttut inatsisartuini ukioq manna sammisassatut aalajangiussaavoq: Nunarsuarmioqataaneq, taannalu Katuami sammitillugu ippassaq arfininngormat aallarniutigineqarpoq.

Inuusuttut Inatsisartui pisortatigoortumik ammaanersiorneqassapput aqagu ataasinngornermi februaarip ulluisa 16-ianni ullaakkut nalunaaqutaq qulingiluanut, ammaasuussalluni Ruth Heilmann.

Sisamanngorpat naggataarnersiorneranni inaarutaasumik aalajangersakkat Inatsisartut siulittaasuannut Ruth Heilmannimut Naalakkersuisullu siulittaasuannut Hans Enoksenimut tunniunneqassapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq