Inuusuttut Inatsisartui: Imigassamik ajornartorsiutigut amerlavallaaqaat
HHX-mi Niuernermik Ilinniarfimmi Qaqortumi ilinniartut siunnersuuteqarput, imigassamik ikiaroornartumillu atornerluinerup akiorneqarnissaanik suliniuteqartoqassasoq. Atornerluisut inuiaqatigiinnut akuunerulernissaannut periarfissaat aamma annertusarneqartariaqartut.
Siunnersuummik saqqummiussisoq Natasha Damgaard oqarpoq, namminersulivissagutta nunatsinni sulisinnaanngitsut, imerajuttullu annertusileriikkamik ikiorsiissutinik pisartagallit ikilisinneqaqqaartariaqartut.
- Namminersulivissagutta sulisinnaanngitsut imerajuttullu inuiaqatigiinnut akuunerulernissaannut periarfissaat annertusartariaqarpagut, suliffinnullu uternissaannut ikiorlugit. Tamanna angunissaanut kommunit namminneq suna pisariaqartinnerunerlugu nalilersussavaat.
Ilinniagaqanngitsut pikkorissartinneqarsinnaapput ilinniagaqarnissaannik ingerlariaqqinnissaannillu ikiorlugit.
Isumaqarpungalu periuseq tamanna anguneqarsinnaasoq mittarfiliornerit kinguartilaaraanni nunatsinnilu inuiaqatigiit ajornartorsiutaat qaangerniarlugit sulissuteqartoqaraanni.
Imigassamik ajornartorsiuteqarnerput paquminartutut isigineqarunnaartariaqarpoq, ikiorneqarnissamullu periarfissat saqquminerulerlutik, Natasha Damgaard oqarpoq.
