Inuusuttut imminnut tatiginngillat

aggustip 15-at 2005 14:01

Ilulissani takornarianik sullissisut quliugaangata agguaqatigiisillugu kalaaleq ataasiinnaasarpoq.

imminut tatiginnginneq, oqaatsinullu pikkorlunneq kalaallit takornarianik sullisserusututtannginneranik pissuteqartoq, ukiuni kingullerni sisamani aasaanerani takornariartitsinermut sullissisuusartoq, Tuperna Davidsen oqarpoq.

- Inuusuttut amerlanerit takornarianik sullississallutik pilerigisarunaraluarpaat, amerlanerilli oqaatsinik piginnaasaqarpallaannginnertik pissutigalugu tunuarsimaartarput, Tuperna Davidsen, Ilulissani aasaanerani takornarianik sullissisartoq oqarpoq nangillunilu:- Oqaatsinik kukkusinnaaneq ajunngilaq aamma takornarianik sullissineq oqaatsinik ilinniarfittut atorluarneqarsinnaavoq. Takornariat sullillugit inuttut ineriartuutigaara, tuluttullu oqalunnermut ilinniutigilluarlugu. Aamma ullut tamaasa sulisarneq allanngorartarpoq, aamma takornariat kalaallinik sullinneqarnissartik pingaartittarpaat, taamaammat qallunaatut tuluttullu oqalulaarsinnaagaanni takornarianik sullissineq nuannersorujussuuvoq pissarsinarlunilu.

Taama oqarpoq, Ilulissani takornaianik angallassisartoq, Tuperna Davidsen. Ilulissani takornariartitsisarnermut sullissisartussanik pikkorissaaniartaraluarneq, soqutiginnittut ikippallaarneri pissutaallutik iluatsittarsimanngilaq.