Inuusuttut imertariaasiat maluginiarneqarpoq

apriilip 29-at 2006 17:07

Sapaatip akunnerata tulliani sapaatip akunnera 18-i aallartissaaq, imigassaq nunatsinnilu imertariaaseq pisarnertut sammineqassallutik. Tassani inuusuttut imertaariaasiat immikkut maluginiassallugu pisariaqarpoq.

Namminersornerullutik Oqartussanit maluginiarneqarsimavoq, Danmarkimi inuusuttut imertariaasiannik misissuinerup takutikkaa inuusuttut Danmarkimi imernerulersimasut, tamannalu nunatsinni aamma takussaanerulersinnaasoq ilimagineqarsinnaavoq.

-Nunatsinni inuusuttut akornanni imertariaaseq Danmarkimi inuusuttut imertariaasiannut assinguleriartortoq maluginiarparput, tassalu inuusuttut imernerulersimasut, aanngajaarniutinullu assigiinngitsunik misileraanerulersimasut, Paarisami siunnersorti Poul Petersen oqarpoq.

Paarisa-p inuusuttut akornanni imigassartorneq aanngajaarniutinillu atuinerat pinaveersaartitsissutigalugit immikkut anguniarpaat. Taamaammat inuusuttut imernerulissappata ernumanarpoq.

-Inuusuttut aalakoorniaannarlutik imertarpata ernumanartortaa unaavoq siunissaq eqqarsaatigalugu attatiinnarunikku pinaveersaartitsineq imaluunniit pitsaaliuinissaq suli ajornakusoornerulissammat. Tassa aalakoortarneq aallutiinnarunikku kikkunnut tamanut oqimaannerulerluni artorsaatinngortussaammat. Tassanilu ilaqutariinneq, meeqqanut inuusuttunullu pinaveersaartitsinitsinni eqqumaffigisorujussuuagut, Poul petersen oqarpoq.

Ilanngullugu oqarpoq Paarisap inuusuttut soqutigisaat aqqutigalugit anguniarneqartut, ilaatigut internet-i mobiltelefonilu aqqutigalugit.

-Periutsit allat atorniarneqartarput. Meeqqat inuusuttullu atuarfinnut ornillugit peqataanerutinniarneqartarput, nammineq isumasiorlutillu oqallissinnaanerat eqqumaffiginiarneqarluni. Taamatuttaaq qarasaasiakkut pinaveersaartitsineq siunissaq eqqarsaatigalugu atorneqarsinnaavoq, nittartakkat sms-it assigisaalu ilanngullugit, Poul Petersen naggasiivoq.