Inuusuttut illuat "Mælkebøtten" ammalerpoq

Meeqqat inuusuttullu illu ornittarsinnaasaat Nuummiittoq, Mælkebøtten aqagu ammarneqassaaq.

Illu inuusuttunit orninneqarsinnaavoq, tassani assigiinngitsunik assassorsinnaapput, internet-ersinnaapput imaluunniit eqqissisimaarujoorsinnaallutik. Inuusuttut angerlarsimaffimminni ajornartorsiuteqarunik aamma illumi sinissinnaanissaminnut nerisinnaanissaminnullu periarfissaqarput.

Neriuutigineqarpoq illu iluaqutigalugu ajornartorsiutinik kingornussisarneq qaangerneqarsinnaassasoq. Mælkebøtteni tusagassiutinut nalunaaruteqarnerminni allappoq, Nuummi meeqqat sumiginnakkat atugarisaat taamaalillugit pitsanngorsarsinnaassallugit, ilaatigut nerisaqarnissaannik ornitaqarsinnaanissaannillu periarfissillugit.

Red Barnet, Grønlands Arbejdsgiverforening, Nuuk Rotary Club, Lions Club-ilu suliniummi tunuliaqutaapput.

Aningaasat 7 millioni koruunit katersorneqarsimapput, taakkulu illumut pisinermut, illup pilersinneqarneranut, 2006-milu ingerlatsinermut aningaasartuutissanut matussusiipput. Aningaasanik tunisisunut aamma ilaapput Kunngissaq Frederik nulialu Mary.