Inuusuttut ilinniariartorusunnerat tusarluarnartuuvoq
Kujataaniit Tunumiillu misissuinerit takutippaat atuartut affaasa missaat, meeqqat atuarfianni naammassigunik Nuummut nunanulluunniit allanut nuukkusuttut. Taakkunani niviarsiaqqat amerlanerunerat Nivi Christensenip nalunngilaa, namminermi aamma Tasiilap qimannissaa siunertariuaannarnikuuaa.
Nivi Christensen oqarpoq qaffasinnerusumik ilinniagaqarnissani siunertariuaannarnikuullugu. Inuusuttullu arlaannut nuullutik ilinniagaqarusunerat nuannersutut tigusariaqarparput. Tamassumami takutiinnarpaa inuusuttavut nunarsuarmiutulli allatut malinaasut aporfissatillu qunuginngikkaat. Nunarsuatsini attaveqaqatigiittarneq aqqutigalugu inuusuttavut allamukarusuttarput, aammali allamiut amerlanerusut Nunatsinni najugaqartalernissaat uagut ilimagisariaqarparput. Nivi Christensen aamma oqarpoq ilinniakkaminik naammassereeruni Nunatsinnut uterusulluni, kalaallinillu meeraqalerusulluni. Sorpassuilli apeqqutaapput. Ilinniarsimasanimi atussagunigit sumiinnissaminut aamma tulluarsartariaqarpai, soorlu nalunngilaa maanna ilinniagarisani Tasiilami atorsinnaanaviarnagu, naak Tasiilaliaqqikkusukkaluarluni. Aappaqaraannimi meerartaarlunilu, taakkua aamma pisariaqartitaat eqqarsaatigisariaqarput.
- Danmarkimi ukiut arfineq marluk tikillugit najugaqarnikuulluni soorunami aamma ikinngutit qimattariaqassapput. Kisianni ilimagaara uanga anaanattuut misigissallunga, tassa meqqiuleruma taakkua kalaaliunissaat kissaatigilissavara. Kalaallit Nunaammi aamma qaquguluunniit qimavissornavianngilara, Nivi Christensen oqarpoq.