Inuusuttut ilinnialernissamut piareersimanngillat

linniarnertuunngorniarfinni ilinnialersartut nukangavallaarlutik aallartittarnerat amerlavallaat ilinniakkaminnik unititsiinnartarnerannik kinguneqarpoq.

- Malunnartorujussuuvoq, ilinniartut atuarnissaminnut piareersimaneq ajortut. Ilinniartullu piumasaqaatinik malinninnissaminnut sungiussisimasarnerat killeqartarluni, Kujataata Ilinniarnertuunngorniarfianni Qaqortumiittumi pisortaq Else Poulsen oqarpoq.

Qaqortumi Niuernermik ilinniarnertuunngorniarfimmi maluginiarneqarsimavoq, ilinniakkaminnik unitsitiinnartartut malunnaatilimmik amerlisimasut.

HHX-imi 42-t ukioq manna ilinnialersimapput, maannamut 14-it unereersimallutik.

Tamanna pillugu Else Poulsen oqarpoq, 11. klasseqarneq uterteqqissappat ajoriffissaqartinnagu.

- Uanga aperineqartuuguma, angissagaluarpunga. Isumaqarama ilinnialersartut inerisimanngippallaartartut, ilinniaqqinnissaminnullu piareersimassanatik, Else Poulsen oqarpoq.

Ilinniakkamik unititsiinnartarneq aningaasatigut nunatsinnut akisussaqisoq, Kujataani Ilinniarnertuunngorniarfimmi pisortamit aamma oqaatigineqarpoq.

- Aningaasarpassuit atorneqartarsimassapput, tassami ilinniartitsisorpassuarnik atorfinitsitsisarpugut. Ilinniartut illoqarfinnit allaneersuugaangamik kollegiani najugaqartarput, angerlarnissaannullu bilitsii nunatta karsianit akilerneqartarput, pisataallu aamma inuup illoqarfigisaannut nassiunneqartarlutik. Taamaammat inuiaqatigiit aningaasarpassuit asuli sapangiinnartarpaat, Else Poulsen oqarpoq.

Ilinniartitsisunuttaaq piffissaq ilinniartitsinermut atorneqarani, perorsaaniarnermut atorneqarnerulersimasoq oqaatigineqarpoq.

- Ilinniartitsisut ilinniartitsisuunermik saniatigut, perorsaasutut, inulerisutut allaallu politiitut atorfeqalernikuupput, Else Poulsen oqarpoq.

Sisimiuni teknikkikkut Ilinniarnertuunngorniarfimmit oqaatigineqarpoq, maanna 2. HTX-imi ilinniartut 75-it allartittuusut ilaat 27-t maannamut anisimasut.