Inuusuttut: Ikinnerussuteqartut puigornagit

marsip 04-at 2005 10:46

Inuusuttut Inatsisartuisa ataatsminiinneranni inaarutaasumik nalunaarusiaat saqqummiunneqarpoq.

Inuiaat kalaallit aaqqissuussaaneranni tamat oqartussaaqataaneranni immikkoortut ilanngunneqartariaqartut aalajangersakkami atuarneqarsinnaavoq.

Inuit tamat oqartussaaqataanerat Inuusuttut Inatsisartuisa ataatsimiinnerminni ukioq manna sammivaat, aalajangiinerillu amerlanerussuteqarnikkut aalajangerneqartarnissaat tunngaviulluinnarpoq. Taamaattorli ikinnerussusillit soqutigisaat innimigalugit periaaseqartoqassasoq Inuusuttut Inatsisartuisa oqariartuutigaat.

Pisortani oqartussaasut innuttat siunnersuutaannik isumaannillu tusaaniartuassapput, inuiaqatigiinnullu pingaarutilinnik aalajangiisoqartillugu taasitinneqartassallutik Inuusuttut Inatsisartuisa aalajangiuppaat.

Aalajangiussaasalu ilagaat pinerluuteqartarnerit aanngajaarniutinillu atornerluinerit pinngitsoortinniarlugit suliniutit assigiinngitsut aallartinneqartariaqartut.

Pitsaaliuiniarnermilu sunniutit nutaaliat atorneqassasut siunnerfigineqarpoq, soorlu qaammarsaaniutit, filmit, piviusuusartitsineq nipilersornerlu atorlugit pitsaaliuisoqarsinnaavoq.

Ilinniagaqartut meerallit qaammammut meeqqanut tapisiaat aamma qaffanneqartariaqarput, tamatumalu aningaasalerneqarnerani ilinniagaqartut tamarmik nammaqataanissaat kaammattuutigineqarpoq.

Ilinniartut unittoorsimasut aallarteqqinnissaannut ikiorneqartariaqartut inuusuttut inatsisartuisa ujartorpaat, ilaatigut siunnersuutigalugu atuarfimmik najugaqarfiutigisumik pilersitsisoqarneratigut.

Inuusuttut Inatsisartuisa aalajangersagaliaat Inatsisartut siulittaasoqarfianut, naalakkersuisullu siulittaasuannut tunniunneqarpoq, Namminersornerullutillu Oqartussat nittartagaani atuarneqarsinnaalereerluni.

Aalajangersagaq Folketingip siulittaasuanut, Christian Mejdahlimut aamma tunniunneqarumaarpoq.