Inuusuttut atuakkiaat amigaatigineqaqaat

Oqaluttualianik kalaallit inuusuttut atuakkiaannik saqqummersitsisarfiit saqqummersitassaminnik amigaateqarput. Inuusuuttuinnaalli atuakkiaannik maqaasinngillat aamma inersimasut atuakkiortut oqaluttualiaannik saqqummersitsiviit amigaatigineqaqaat.

Atuakkiat saqqummersinneqartartut allariaaseq ataasiinnaavallaaq atorlugu atuakkiarineqartarput, soorlu taalliat ilinniarnermullu tunngasuunerusut maanna saqqummersinneqarnerusarlutik. Tamassuma kinguneraa atuakkanik ikippallaanik atuagassaqarneq aamma kalaallit oqaatsitta atorneqarneranut tamanna kinguarsaasinnaasoq, saqqumersitsisartut isumaqarput.

- Inuusuttut ikippallaaqaat saqqummersitsisartut, tamannalu qamuuna annernarpoq, atuakkanik saqqummersitsisartoq Inger Hauge oqarpoq.

Saqqummersitsiviit marluk, Atuagkat aamma Milik Publishing radioaviisimit aperaagut oqaluttualianik inuusuttunit allanneqarsimasunit qassinik nassinneqartarnersut. Milik Publishingimi piginnittoq, Lene Therkelsen ima akivoq:

- Amerlavallaanngillat. Inuusuttut amerlanersaat taalliatigut oqaluttuarniartarput ikittuaraannaallu oqaluttualiatigut isummaminnik saqqummersitsisarlutik, Lene Therkelsen taama naliliivoq.

Saqqummersitsiviup Atuagkat piginnittuat, Inger Hauge ima aanmma naliliivoq:

- Atuakkiortunit inuusuttunit ajoraluartumik nassinneqarneq ajorpunga, tamannalu qamuuna annerisarpara. Atuakkiortut inersimasut kisimik nassiussigajupput. Imaassinnaavoq inuusuttut kalaallisut oqaatsitik atorlugit atuakkiornissaminnut ajukkuttartut, Inger Hauge oqarpoq.

Atuakkanik kalaallisuunik saqqummersitsiviit Nunatsinniittut marluinnaapajaarput, tassalu Milik Publishing aamma Atuagkat, tamarmik inummit ataasiinnarmit ingerlanneqartut. Taakku suliassaqarluaraluarput, saqqummersittagaalli atuakkat sammivii ataasiinnaavallaarlutik:

- Taalliat eqqaamasalikkersaarutillu atuakkiortunit maanna sammineqarnerupput. Oqaluttuanik oqaluttualianillu atuakkiortoqarnissaa uanga nammineerlunga kissaatigeqaara. Tassami qamannga pisumik oqaluttualioraanni tamanna oqaatsit pitsaasumik atorneqalernerannik kinguneqartarpoq, tassalu tamanna kalaallit oqaasiisa siuariartornernut iluaqutaasinnaagaluarluni, Inger Hauge oqarpoq.

Taanna kalaallit atuakkiaannik 1994-imi saqqummersitsisalerpoq.

Milik Publishingip piginnittua, Lene Therkelsen aamma inuusuttut oqaluttualiaannik maqaasisarpoq.

- Atuakkat oqaluttualiat amerlanerunissaat kissaatiginarpoq. Tassami taakku ullutinnik pisunik kulturitsinnillu takutitsisarmata aammalumi atuakkioriaatsit assigiinngitsut Nunatsinnut pingaarutipilussuugaluarmata, Lene Therkelsen oqarpoq.

Inuusuttut atuakkiorusunnginneri aammalumi atuakkiat ikippallaarnerisa ajornartorsiutaaneri Ilimmarfimmi lektorip, Karen Langgårdip Radioaviisimut oktobarip 20-anni oqaluttuaraa. Tamatuma kingorna inuusuttut marluk oqaluttuarput, Nunatsinninngaanneersunik atuagassakippallaartoq taamaattumillu atuassagaagamik qallunaatuunik tuluttuunilluunniit atuartarlutik.

Tamannamita qanoq iliuuseqarfigineqarsinnaava? Nuummi GU-mi atuartut qanittukkut piumaffigineqarnertik malillugu oqaluttualiaminnik saqqummersitsipput, immaqa tamanna aqqutaasinnaasoq?

- Tamanna aallarniutaasinnaalluarpoq. Assersuutigalugu oqaluttuanik atuakkiornermik inuusuttut ilitsersuukkaanni, oqaluttuallu atuakkamut ataatsimut ilitsersuisulerluni suliaralugit saqqummersikkaanni taava atuagatsialanngussagaluarput. Milik Publishingimi piginnittoq, Lene Therkelsen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat