Inuusuttut Ataqatigiit: Urani nunatta tamarmi susassaqarfigaa
IA-p inuusuttaasa HJens Erik Kirkegaardip Kujataani pineqartoq pillugu innuttaasunik taasisitsinissamik isummersimanera paasisinnaanngilaat. Taakkumi isumaqarput nunatsinnut tamarmut innuttaasunullu tamanut attuumassuteqartoq. Tamannalu pissutigalugu Kujataaniinnaq taasisitsoqarnissaaa akuerinagu.
- Inuusuttut Ataqatigiit Naalakkersuisut kaammattorusuppagut nunarput ataasiusutut isigeqqullugu, taamaattumillu naalakkersuisunut eqqarsaatigilluaqquarput qanoq iliorluni nunatsinni avissaartuuttoqannginnissaa anguniarneqarsinnaanersoq, Inuusuttut Ataqatigiit siulittaasuata tullia Jane Petersen oqarpoq.
Jane Petersenip Inuusuttut Ataqatigiinnilu suleqataata Kommuni Kujallermi borgmesterip Jørgen Wæver Johansenip KANOKOKA-llu pisumut isummersimanerat aamma apeqquserusuppaat.
- Kommuni Kujallermi borgermesteri Jørgen Wæver Johansen apererusupparput isumaqannginnersoq uranimut politikki nunatsinnut tamarmut attuumassuteqannginnersoq. KANUKOKA-mitaava Kommuuni kujallermi najugallit kisimik sunniuteqaqataanissaannut periarfissinneqarneranut qanoq isummersuuteqarpa, Jane Petersen aperivoq.
