Inuusuttut Ataqatigiit qinersisoqarnissaa kissaatigaat
Namminersorlutik Oqartussani atorfinitsitsinerit, soraarsitsinerit soraartoqartarneralu Inuusuttut Ataqatigiit naammagiunnaarpaat. Tamanna aamma aatsitassanik uranitalinnik akuersaanngilluinnarnerup atorunnaarsinnissaanu, qineqqusaarutit eqquutsinneqanngitsunut, suliffissaaleqisunut qaffakkiartortunut, aalisarneq pillugu politikkimut ajorluinnartumut aningaasanullu inatsisissamut piffissaanngitsukkut amigartoorfiusumut tunngatillugu atuuppoq.
Tamannalu tunngavigalugu Inuusuttut Ataqatigiit isumaqarput maannakkorpiaq qinerseqqitoqarnissaa nunatsinnut pisariaqarluinnartoq, taamaaliornikkummi innuttaasut qineqqusaarutit eqquutsinneqanngitsorpassuit pisullu nuanninngitsorpassuit isummerfigisinnaassavaat.
Ukiup affaata ingerlanerinnaani kukkuluttornerit annertuut tulleriiaaginnaavillutik pisut ernumanarluinnarput. Inuusuttut Ataqatigiit isumaqarput, iluameersumik politikkimik ingerlatsisinnaanngikkaanni inuiaqatigiit Inatsisartunik nutaanik qinersinissaanut periarfissinneqartariaqartut, Múte Bourup Egede oqarpoq.
Siumut qineqqusaarnermi qujageqqusaaginnarluni politikkeqarnera takoreerlugu, Simut naalakkersuisuutitaasa taama ingasatsigisumik pineratg Inuusuttut Ataqatigiit siulittaasuata tupaallaatiginngilai.
-Qineqqusaarnermi oqaatigineqarsimasut eqqarsarnanngitsuusimanngillat, taamaammat pisut qanoq ingerlanneqarsimaneri tupaallaatigisimallugit oqarsinnaanngilanga. Taamatut pisoqarnissaa takorluukannereerpara, maannali pisut nuanninngitsut tulleriiaatiinnalernerat nuanningilaq, Múte Bourup Egede knr.gl-imut nassuiaavoq.
