Inuusuttut Ataqatigiit: Partii Inuit qanoq isumaqaraluarnerpat?

Ulluni kingullerni paatsuunganarluinnarpoq Partii Inuit uranimut aatsitassanullu qinngornilinnut piiaanissamut attueqqusinngilluinnarnerup atorunnaarsinneqarnissaannut ukiamut Inatsisartut ataasimiilernissaannut akuersaassanersut imaluunniit innuttaasunik taasisitsinissamik piumasaqarumaarnersut. Inuusuttut Ataqatigiimmi isumaqarput isummersuutit taakku marluk assigiinngilluinnartut, Inuusuttut Ataqatigiit taama allapput.

Taamaattumillu Inuusuttut Ataqatigiit Partii Inuit apererusupparput naalakkersuisooqataanertik ilutigalugu tunniutiinnarsimanersut, imaluunniit inatsisartunut qineqqusaarnerminni qineqqusaarutertik attatiinnarniarneraat. Kiammi puigunngilaa uranimut aammalu aatsitassanut qinngornilinnut piianissamut naaggaarnerat.

Inuusuttut Ataqatigiit Randi Brobergip isumaqatigaat massakkorpiaq tunngavissaqanngitsugut uranimut aammalu aatsitassanut qinngornilinnut piianissamut attueqqusinngilluinnarnerup atorunnaartinnissaanut.  Taamaattumillu ineqarnermut pinngortitamut avatagiisinullu naalakkersuisuutitaat Mette Lynge aammalumi Partiip siulittaasua Nikku Olsen apererusupparput uranimik aammalu aatsitassanik qinngornilinnik piiaanissamut attueqqusinnginnerup atorunnaartinnissaanut akuersaarnersut.

Alianartutullumi oqaatigisariaqarpoq Partii Inuit apeqqummut uranimut tunngasumik inatsisartunut siunnersuuteqarsimanngimmat, naak naalakkersuisooqataaleramik ilisimareeraluarlugu Siumut uranimut aamma aatsitassanut qinngornilinnut piiaanissamut ammasumik pissuseqartoq.