Inuusuttut Ataqatigiit Jess G. Berthelsen illuatungilerpaat

- Upperaarput, nunatsinni kalaallinik kalaallisut oqaluttunik kalaallinillu qallunaatut oqaluttunik qinersisimasut, pissutigalugu inuusuttut qineqqusaartut qinerneqartullu nutaat nunarput ajunnginnerpaamik sullikkusummassuk. Inuusuttut akisussaasut allannguerusullutik qineqqusaartut kattuffinnut tamanut nutaarsiassatsialaasariaqaraluarput maani nunami. Innuttaasut nunami maani ataqatigiinneq atorfissaqartippaat, Inuusuttut Ataqatigiit qisuariaamminni taama allapput.

- Inuusuttut Ataqatigiit isumaqarput ilinniarnissamut periarfissat oqaatsimik ataasiinnarmik oqaaseqartunut pitsaanerussasut, apeqqutaatinnagu kalaallisut qallunaatulluunniit pikkoriffiginerulerusunneraat.

Inuusuttut Ataqatigiit aamma qinerneqartut nutaat qallunaatuinnaq oqaasillit kajumissaarusuppaat tapersersorusullugillu kalaallit oqaasiinik ilinniarnissaannik.

Kialluunniit, aamma SIK-p, nalunngilaa inuit 18-ileereersut kikkulluunniit inatsisartunut qineqqusaarsinnaatitaasut, SIK-llu tamanna qallunaatuinnaq oqaluttunut periarfissaq matuniarpassuk ersarissumik nalunaarutigisariaqarpaat.

Kinaluunniit Inatsisartunut qineqqusaartoq sunniuteqaqataanissamik akisussaaqataanissamillu ujartuivoq, aammattaaq naalakkersuisunngornissamik periarfissiippat, Inuusuttut Ataqatigiit Jess G. Berthelsenip kalaallit oqaasii pillugit oqaaseqaataanut qisuariarlutik taama allapput.