Inuusuttut Ataqatigiit: Imminnut ataqatigiinngillat

Inuusuttut Ataqatigiit siulittaasuata tullia Jane Petersen taama aperivoq, Naalagaaffiit Peqatigiit Nunat inoqqaavinut ippassaq ulloqartitsinerannut atatillugu Aleqa Hammond nersorinninniarluni Nunarput nunat allat inoqqaavinut maligassiuisuunerarlugu oqaatigereeraalu.

- Naalakkersuisut siunertaat Inuusuttut Ataqatigiit apeqquserpaat, tamatumunngami peqatigitillugu aningaasanut inatsisissatut siunnersuutiminni ICC-mut tapiissutiminnik ikilisaaniarmata, naak taanna nunat inoqqaavisa pisinnaatitaaffiinik ilungersuuteqartuugaluartoq!

Inuusuttut Ataqatigiit isumaqarput, nunatut ineriartortutut Nunarput suliniaqatigiiffinnik naalakkersuinikkut pituttorsimanngitsunik pisariaqartitsisoq.

- Innuttaasut inuttut pisinnaatitaaffinnik assigisaannillu oqallittarfeqarnissaat pisariaqartoq isumaqarpugut, Jane Petersen allappoq.

Taamaattumik Inuusuttut Ataqatigiit Siumup Inuusuttunut Suleqatigiiffia aammami Siumut apererusuppaat, Namminersorlutik Oqartussat ICC-mut tapiissutigisartagaasa ikilisarnissaannut maanna piffissaanersoq.