Inuusuttut Ataqatigiit ataatsimiipput
Inuusuttut Ataqatigiit Aasianni ataatsimiinneranni nunasisimasut toqqissisimasumik inooqataalernissaat suliassatut pingaarnertut isumaqatigiissutigineqarpoq, qulequtserlugu "Tamatta nunatsinni inissaqarpugut".
Allattoq Louise M. Kleemann
Inuiaqatigiinni pisuujussuseq inuusuttut paasinnittaasaat aallaavigalugu oqallisigineqarpoq. Aningaasat kiisalu pigisaqassuseq aallaavigalugit nalilersuisarneq illuinnaasiortuusoq atugaavallaartorlu eqqartorneqarpoq. Tamakkualu inummut pilluartumut uuttuutaalinngisaannassasut Inuusuttut Ataqatigiit isumaqarput.
Aningaasaateqartariaqarnerli saneqqunneqarsinnaanngilaq; partiip inuusuttaasa aaqqissorluagaanerusumik kalaaliminernik akikitsunik pilersuisoqalernissaa ujartorpaat.