Inuusuttut ataatsimeersuarnermi: Inersimasut atuunnerat qaangiuppoq
- Inuusuttut COP15-imi peqataasut naalakkersuinermik sulialinnut eqqaasitsissutaat tassaavoq namminneq siunissartik pineqarmat. Taama oqarpoq Janice Grey Canadap issittortaaneersoq.
- Inersimasut atuunnerat qaangiuppoq, taamaattumillu uatsinnut tusaaniartariaqarlutik, taama oqarpoq.
Inuusuttut nunarsuarmit tamarmit peqataasut ippassaq aappaluartunik tujuululersorsimapput imminneq peqataanertik nipertillu malugeqqullugu.
Janice Grey torlussorluni erinarsortartuuvoq inuusuttullu ilaatigut Inuit Games peqatigalugit issittumi cirkusimik suliaqartut peqatigalugit isiginnaartitsisassalluni. Isiginnaartitsineq marlunngornermi unnukkut pingasunngornermilu unnukkut Københavnimi Strøget-mi Nytorvimi takutinneqarmat nuannarineqartorujussuuvoq.
- Naggueqativut uagullu kinguaariiusugut pilluta maaniippugut. Peqataasimassanngikkaluarpunga inuusuttut aammattaaq COP15-imi aalajangiinissanut peqataasinnaasut upperisimanngikkaluarukku.
