Inuusuttut Arctic Winter Games ammarpaat

Ulloq Whitehorse-mi sivisuumik utaqqisaq takkuppoq. Arctic Winter Games-it 22-issaat aallartippoq ammaanersiornerlu inuusuttorpalaartumik aaqqissuunneqarsimavoq.

Inuusuttut aqutsisuuppu aliikkusersuinermilu hip hop-mik rockimillu nipilersortoqarpoq inuusuttunit nuannarineqarluartumik. Ukiullu aqqaneq marluk matuma siorna Whitehorse aamma aaqqissuisuuvoq.

- Ukiut marluk kingulliit piareersarsimavugut. Sorpassuilli allanngorsimapput 2000-imi Whitehorseimi Arctic Winter Gameseqarneraniit. Illoqarfiup innuttai, timersortartut, piumassutsimik ikiuuttut, kulturikkut takutitsisussat aningaasaliisullu tunulequtaapput unammersuarnerit illoqarfitsinni ingerlanneqaqqissinnaanerannut, Whitehorse-mi aaqqissuisut siulittaasuat George Arcand oqarpoq.

Maannalu tassa timersortartut sungiusarnerat piareersarnerallu qanoq angusaqartitsisinnaanersoq pissanngatigineqarpoq.

Isiginnaartut 700-ut, immikkut qaaqqusat 200-ut minnerunngitsumillu timersortartut 2.000-it Arctic Winter Games 2012ip ammaanersiorneqarnera puigunaatsunngortippaat. Ammaanersiornerlu timersortarfissuarmi  Canada Games Centre-mi pivoq taannalu Nuummi timersortarfissuup Inussiviup tallimariaata missaliorlugu angissuseqarpoq.

Unamminerit aallartereerput inuusuttuaqqallu nukarliit angutit arsaattartut Alaska 10-4-mik ajugaaffigaat unamminermi siullermi.