Inuusuttut aqqutissiuunneqartarput

Nuummi Qorsussuup atuarfiani atuartut 16-t atuanngitsuukulavallaarmata atuarunnaartutut naatsorsuutigineqartariaqalersimasut iliuuseqarfigineqassappata alloriarneq tulleq tassaavoq iliuusissamik pilersaarusiornissaq.

Inuusuttut ikiorniarlugit iliuusissamik pilersaarusiortarneq nunatsinni nutaajuvoq tassami siorna aatsaat suleriaaserineqartalerpoq. Nuup kommuneata ataani Nuuk kompetence Centerimik taaguuserneqarsimasup, maannakkut inuusuttut katillugit 61-t ingerlariaqqinnissaannik ikiorniarlugit iliuusissamik pilersaarusiorsimalereerpoq.

Inuusuttut ilaat pikkorissartinneqanngikkaangamik misiliummik sulisinneqartarput ilaallu Danmarkimi højskolertinneqartarlutik.

Nuuk kompetence centerimi aqqutissiuisutut atorfeqartup Margrethe Poulsenip iliuusissamik pilersaarusiortarneq qanoq isumaqarnersoq nassuiarpaa.

- Iliuusissaq aallaavittut atorneqartarpoq, ilinniagaqarnissamut sulinissamulluunniit aqqutissiuusisussaalluni. Imaanngilaq maleqqissaarneqassasoq tassa imaappoq ingerlaarnerani allanngortinneqarsinnaavoq, Margrethe Poulsen nassuiaavoq, nangipporlu:

- Inuk aallaavigineqartarpoq sumut killinnersoq takoqqaartarparput taava ujartuisarpugut suunukua anguniarunigit angorusutani angusssagai, oqarpoq.

Taanna aamma nassuiaavoq inuusuttut atuarunnaartartut aamma qallunaat oqaasiinik aporfeqartarsimasut. Taamaattoqartillugulu FSA aammalu FSUA periarfissatut atorneqarsinnaasartut.

- Taakku septembarimi aallartissapput, faginik ataasiakkaanik tigusisoqarsinnaavoq, imaluunniit fagit tamarmik tiguneqarsinnaapput. Faginik ataasiakkaaginnarnik toqqaasoqarsimatillugu taava saniatigut sulinermik ilalerneqarsinnaavoq, imatut paasillugu suliitigaluni faginik ataasiakkaanik atuartoqarsinnaalluni, Margrethe Poulsen oqarpoq.

Iliuusissamik pilersaarusiortarneq siorna aatsaat atorneqaleraluartoq unnersiutigineqartarsimavoq.

- Aqqutissiuunneqartarneq atuarfinni allani iluaqutaanera malunnarsisimavoq, tassami inuit ataasiakkaat takorluuisinnaalernerunikuupput sunaana ornikkiga? , Margrethe Poulsen oqarpoq.

Inuusuttut iliuusissamik pilersaarusiunneqarsimasut ilinniagaqarnersiuteqartinneqartarput. Namminneq illoqarfigisaminni najugaqarunik 2200 koruuninik qaammammusisarput avataaniit atuariartorsimagunik 4200 koruunisiaqartarlutik.