Inuusuttut aningaasanik aqutsisinnaanngitsut ilinniartinneqartalerlik
50.000 koruuninik qaamammusigami aqaguagukkuani anaanaminut tupasiniutissaminik atorniarpoq.
Pissutsit tamakku aallaavigalugit Siumut tunuliaqutaralugu Inatsisartuni ilaasortaq Malik Berthelsen meeqqat atuarfiani fagitut aningaasanik aqutsineq ilinniartitsissutaalersinnaannginnersoq apeqqutigaa.
Naalakkersuisut aningaasaqarnikkut ingerlatsineq pillugu nalunaarutaanni allassimavoq kilisaatini inuttaasut ukiumut 600,000 koruuninik isertitaqartut. Aningaasanik aqutsinissamik ilinniartinneqarnissaq tamanut periarfissaasariaqarpoq Malik Berthelsen isumaqarpoq.
- Aatagigaluama oqaaqqissaartuaannarnikuuaanga aningaasat pinnguaanngitsut aningaasat erniortitassaasut, tamannalu uanga iinikuuara, Malik Berthelsen oqarpoq.
Meeqqallu taamak pineqarnissaminnut periarfissaqanngitsut meeqqat atuarfiani naammassinnginnerini qaammarsarneqartariaqartut Malik Berthelsen isumaqarpoq.
Inatsisartut suleriaasiat § 36 immikkoortoq 1 naapertorlugu Naalakkersuisunut apeqqummini ilaatigut ima allappoq.
- Aningaasanik annertuumik atornerluineq aningaasarsiffinni, utoqqalinersiffinni, augustip naanerani akileraarutinik utertoorfinni kiisalu kilisaatit tikiffiini imaluunniit aningaasarsisimaffiini ersarissorujussuarmik takuneqarsinnaajuaannarpoq.
Tamannalu siornatigut borgmesteriusimasup ullumikkullu Atuisartut Siunnersuisoqatigiivini siulittaasup Nikolaj Ludvigsenip ilalernartippaa.
- Pissusissaatut isigiinnalernikuuarput aningaasaq tigugutsigu atupallallugu, taamaammat Malik Berthelsenip oqarneratuut tamanna qaangissagutsigu kingulissagut pitsaanerusumik aqutsisinnaassappata meeqqat atuarfianiit aqqutissiuussinissaq piffissanngorluinnarpoq, Nikolaj Ludvigsen oqarpoq, naggasiillunilu:
- Siunissami ajunngitsumik kinguneqartussaq kiap akerlilersussagamiuk?
