Inuusuttut angerlarsimaannarlutik siunnersorneqarsinnaanngorput
Ullumi marlunngornermi oktobarip aallaaqqaataani Nunatsinni meeqqanut inuusuttunullu kiffartuussivik nutaaq aallartinneqarpoq. Oqarasuaatip normuanut ”1899”-imut allannikkut meeqqat inuusuttullu allannermikkut inuiaqatigiinni kalaallini inuusuttuunermik paasisimasalinnit siunnersorneqarsinnaanngorput.
-Neriuppugut SMS-ikkut siunnersuisarfik atorneqarluarumaartoq taamaalilluta meeqqanut amerlanerusunut siunnersuilluarnerulerluta. Ullumikkut SMS-tarneq meeqqat nalunngisarilluarpaat, taamaattumillu siunnersuisarfiit ineriartornermut malinnaasariaqarnerat pingaaruteqarpoq meeqqallu nalunngilluagaatigut atortutigut pissarsiarineqarsinnaasariaqarlutik, Meeqqat Illersuisuat Aaja Chemnitz Larsen oqarpoq.
Siunnersuinermik kiffartuussiviup aallartisarneqarneranut TELE-POST aningaasatigut ikiuutaalluarsimavoq. Aningaasaliisoq ikiusinnaanngitsuuppat siunnersuineq aieqanngitsumik neqeroorutigineqarsinnaangikkaluarpoq. Maannali kikkut tamarmik siunnersuinermik kiffartuussivimmik atuisinnaalerput.
MIO siunnersuisartussanik atorfinitsitsisimavoq taakkulu marlukkuutaarlutik meeqqaat inuusuttullu kiffartuussinermik nutaamik atuisussat siunnersortussaassavaat. Inuit tulluuttumik ilinniagaqarsimasut kalaallinik inuusuttunik siunnersuinissamik suliassaqalerput.
-Siunnersuisartut meeqqat paasinnittariaasiat aallaavigalugu oqaloqateqarsinnaasariaqarput, taamaanngippat meeqqat paasineqaratik misigisimasinnaammata. Kissaatigaarput siunnersuisartuutitta ingerlaavartumik pikkorissartuarnissaat meeqqat ajornartorsiutigisartagaat aallaavigalugit, meeqqanut siunnersorti Bea Platou nassuiaavoq.
