Inuusuttut anersaakkut pissarsitinneqassapput
Meeqqat inuusuttullu siunnersuisoqatigiiffiata Sorlaap inuusuttunik kangerlussuarmi isumasioqatigissitsinerani qulequtaritinneqartoq kingullermilli ataaatsimeersuarnermi pikkorissaassutigineqassasoq kissaatigineqarsimavoq.
Qulequtaritinneqarpoq Inuusuttut peqatigiiffilerinikkut anersaakkullu nukittorsaqatigiillutik isumasioqatigiinnerat.
Peqatigiiffiit Sorlammi ilaasortaatitaqartut marlunnik aallartitaqarput, ilaasortalu nutaat 40-niit 50-it tungaanut amerlassuseqartut ataatsimeersuarnermi peqataassapput. Inuusuttut peqataasut illoqarfimminnut uterunik inuusuttoqatiminnut ingerlatitseqqiinissaat pillugu peqatigiiffilerineq kiisalu meeqqat inuusuttullu pisinnaatitaaffii pillugit ilisimalikkatik oqaluttuarisinnaanngussavaat. Isumasioqatigiinnermittaaq peqataasut nutaajummata anersaakkut pissarsiffiulluarnissaa pisariaqartoq Sorlammi siulittaasoq Britta Nielsen Johansen oqarpoq.
Sakkussaannik suleriaqqinnissaannik ineriartoqqinnissaallu pillugu anersaakkut nukittorsaqatigiinnissaq siulersuisunit ilanngunneqassasoq aalajangiunneqarsimavoq.
Sorlammi siulittaasoq Britta nielsen Joahnsen taama oqarpoq. Sorlammi siulersuisut aaliangersimapput pikkorissarnermi peqataasut aningaasartuutissanik missingersuusiornermik, naatsorsuutilerinernillu aamma pikkorissartinneqassapput.
Meeqqat pisinnaatsitaaffii aamma sammineqassapput, Danmarkimiillu inuit pisinnaatsitaaffiisa allaffianeersoq Christoffer Badse aggersarneqartunut ilaavoq oqalugiassallunilu.
isumasioqatigiineq pikkorissarnertalik ataasinngorpat poorskip aappaata tuingaanut ingerlanneqassaaq. Sorlaap siulittaasua Britta Nielsen Johansen aamma oqarpoq Kangerlussuaq pikkorissarfigissallugu akikinerpaajummat, ataatsimoorfitsialaammallu toqqartaritsik.
