Inuusuttut amerliartortut kigutaat aakkiartorput

Kigutigissaasoq Asta Ettrup Nielsen imeruersaatit tungusunnippallaat soorlu sodavandit killilimmik imerneqartalernissaanik innersuussivoq.

- Inuusuttuaqqat 5., 6., 7. klassemi atuartut qummullu eqqarsaatigissagaanni, ulloq manna takussaasorujussuuvoq kigutaat aakkiartortut. Sodavandisornerminngaaniit saftisornerminngaaniillu kigutit sikassaataat aakkiartortut takussaasorujussuupput. Tassunga pissutaavoq inuusuttuaqqat sodavandit liiterip affaanik angissuseqartut simeerneqarsinnaasut imerneqarpallaarneri. Imermik imeratik sodavandimik najorseqattaarlutik qaniisa ilui sodavandip seernartuanik piffissap sivisuup iluani kigutit sunnersimaartittarpai. Kigutit taamaalillutik aserorterneqartarput. Una kigutinut sikassaat nungukkiartortoq uterteqqinneqarsinnaanngilaq. Sikassaasaataata iluaniittoq aqinnerujussuuvoq, taannalu sunnerneqaraangami soorlu kiguserisutut ilersarput, naak kigutit putoqanngikkaluartut kisianni sikassaasaata aannerata kinguneraa, kigutigissaasoq nassuiaavoq.

- Kigutigut inuunitta sinnerani tamuaatigisassagut paariinarniarutsigit qanoq iliuseqartariaqarnersugut, kigutigissaasup Asta Ettrup Nielsenip sodavandisorpallaarunnaarnissatsinnik siunnersuivoq.

-Tassa pinaveersaartinneqarsinnaavoq inuusuttuaqqat oqaluttuullugillu ilinniartillugit qanoq sodavandit kigutinut sunniuttarnera. Sodavandisornerujussuaq taanna kigutinut sunniuteqartarami ajortumik. Taamaattumik siunnersortarpagut sodavandisorpallaaqqunagit imiinarmik imerunik pitsaanerpaajusoq, kigutigissaasoq naggasiivoq.