Inuusuttut amerlavallaat ilinniarsimanngitsuupput
Inuusuttut 1994-mit 1996-mut inunngorsimasut 30 procentii ilinniakkamik aallartitsisimanngillaat.
Naatsorsueqqissaartarfiup kisitsisaataani takuneqarsinnaavoq inuusuttut 16-it 18-inut ukiullit 2.511-nik amerlassuseqartut. Tassalu taakunannga 800-ut tikillugit ilinniakkamik ingerlataqanngillat. Inuusuttut meeqqat atuarfiannit atuarunnaartut 32 procentii ilinniakkamik aallartitsimanngillat.
- Amerlavallaarput tamanna naalakkersuisuni oqaluuserinerpaasarparput. Siunissami aatsitassanik suliffissuarnilu sulilertussat naammattut nunatsinni sulisorilissagutsigit inuusuttortagut ilinniartittariaqarpagut suliffiit taakkua suliffigilersinnaaniassammatigit, Maliina Abelsen oqarpoq.
Naalakkersuisut ilinniartitsinermut Periusissiaat pillugu nassuiaammi inuusuttut ilinniakkaminik ingerlataqanngitsut 2025-mi 5 procentinit ikinnerulersimanissaat anguniagaavoq.
- Inuusuttut ilinniakkamik ingerlataqalernissaannut aningaasanik immikkoortitsisoqarpoq. Ilaatigut kalaallit Danmark-imi ilinnigaqartut Namminersorlutik Oqartussanit 2013-imi ilinniagaqarnersiuteqartarnerat unitsinneqarpat danskit ilinniagaqarnersiuteqartarnerannit SU-mit pisartagaqalerpata, Namminersorlutik Oqartussat 37 millioner koruuninik sipaaruteqassapput taakkualu nunatsini ilinniartitaanerit pitsanngorsarneqarnissaannut atorneqassapput, aningaasaqanermut naalakkersuisoq Maliina Abelsen oqarpoq.
- Missingersuusiani aningaasanik peqareerpoq taakkunanili annertuumik amigartooruteqarpoq, taakkualu matussuserneqartussaapput, aningaasallu kalaallinut Danmarkimi ilinniagaqartunut atorneqartarsimasut nuunneqarnerisigut amigaartoorutit matussissuserneqartussaapput, Maliina Abelsen oqarpoq.
- Taakkua saniatigit sipaagaqarnikuuvugut, sulilu amigartooruteqaraluartoq inuusuttut ilinniagaqarnissaannut aningaasanik atorneqartussanik nassaarpugut, aningaasartuutinillu allanik sipaaruteqarluta, aningaasaqarnermut naalakkersuisoq oqarpoq.
Aningaasat 10 millioner koruunit aningaasanut inatsisissatut siunnersuummi immikkut aningaasaliissutigineqarnissaat Naalakkersuisut siunniukkaat Aningaasaqarnermut Naalakkersuisoq oqarpoq.
Inuusuttuaqqat meeqqat atuarfiannit atuarunnaaraangamik ilinniakkamik ingerlatitseqqiisannginnerat sumit patsiseqartarnersoq Maliina Abelsenip erseqqinnerusumik nassuiarsinnaanngilaa, taamaattorli pissutaasinnaasut ilagisinaagaat tassaasoq meeqqat atuarfianniit soraarummeersimannginneq imaluunniit tassanngaanniit ingerlariaqqinngitsoortarneq.
- Naalakkersuisuinit saqqummiunnikuuarput, inuusuttut siunnersorneqarnerisa aqqutissiuunneqarnissaata pingaaruteqassusia taamaalillutik ilinniakkamik ingerlataqalernissaat qulakkeerneqassammat aammalu inuusuttut ilinniakkamik ingerlataqanngitsut malinnaavigineqarnissaat qulakkeerneqassaaq taamaaliornikkut inuusuttut aggersarneqassapput siunnersorneqarlutillu sumut ingerlariaqqittoqassanersoq, anigaasaqarnermut Naalakkersuisoq Maliina Abelsen oqarpoq.