Inuusuttut akeqanngitsumik timersortarusupput

- Kisitsisit ilaanni takuneqarsinaavoq 15-ileereersimasut akornanni ilaasortat nalunaarsorsimasut amerlassusaat appariarujussuartartoq. Maluginianngitsuugassaanngilaq, Avijâja Absalonsen oqarpoq.

Kisitsisit 2008-meersut Timersoqatigiit Katuffianneersut takutippaat, ukioqanngitsuniit 14-inut ukiullit 3.564-iusimasut 15-iniillu 18-inut ukiullit 1.742-innaasimallutik.

Ajornartorsiuteqartoqarnera MIPI-p nalunaarusiaani allani aamma takuneqarsinnaareerpoq.

- Nalunaarusiat ilaanni inuusuttut apersorneqarneranni inuusuttut sunngiffimminni sammisassaqartinneqarnerunissartik ujartortarpaat.

Sunngiffimmi peqqinnartumik sammisaqarneq inuiaqatigiinni pinaveersaartitsinermut qanoq pingaaruteqartiginera Imminortarneq akiorniarlugu Nuummi novembari aallartilaartoq ataatsimeersuarnermi aamma paasineqarpoq. Ataatsimeersuarnermi inuit 90-it nunanit avannarlerneersut issittormiullu peqataapput.

- Apeqqutit eqqartorneqartut ilagaat imminornermik qanoq pinaveersaartitsisoqarsinnaanersoq. Erseqqilluinnarpoq sammisassaqartitsineq timersornerlu iluaqutaasut.

Filmiliaq Alaskami inuusuttut timersortalernermikkut imminornissamik eqqarsaateqarunnaarsimasut pillugit pisimasulersaarusiaq aamma takutinneqarpoq.

- Filmip erseqqilluinnartumik takutippaat timersorneq inuunermik annaassisartoq, Avijâja Absalonsen nassuiaavoq.

Taamaammat timersoqatigiiffinni ilaasortaanerup meeqqanut inuusuttunullu 18-it inorlugit ukiulinnut akeqannginnissaa orniginartuutippaa.

- 18-ileereeraangamik aatsaat akiliisalernissaat eqquttariaqarsorinarpoq, Avijâja Absalonsen kaammattuivoq. Meeqqat Inuusuttullu pillugit Ilisimasaqarfiup MIPI-p kisitsisitigut tikkuussissutaanni ukiunut 2004-miit 2008-mut tunngasuni takuneqarsinnaavoq, nunatsinni ukiut tallimat kingulliit ingerlanerini inuusuttut 25-t ataallugit ukiullit 105-it imminorsimasut, taakkunannga nukappissat 75-iullutik niviarsissallu 30-ullutik.