Inuusuttut ajornartorsiuteqartut malugiaarnerusalissavaat

aggustip 23-at 2006 06:50

Inuusuttuaqqat ajornartorsiutiminnik ammasumik oqaluussaqarnerulernissaat anguniarlugu, Danmarkimi ajornartorsiutillit sianerfigisinnaasaat Livslinien, ilinniartitsisut atuartitsissutigisinnaasaannik maanna saqqummersitsipput. Atuartitsissutissap inuusuttut qanoq misigissuseqarnerannik paasititsisinnaavoq, inuusuttullu imminut nuanniitsunik eqqarsaateqarnermikkut imminut aserorsartunut ersarissaasinnaalluni.

Atuartitsissutiliornermut peqqutaavoq inuusuttuaqqat amerliartuinnartut inuunerminnik nuanniilliungaaramik allaat imminornissaminnik eqqarsaateqartalersimallutik sianertalernerat peqqutaalluni, livsliniami immikkoortortami pisortaq Charlotte Berendt-Poulsen Ritzau-mut oqarpoq.

-Inuusuttuaqqat ajornartorsiutitik pillugit oqaloqateqartannginnertik peqqutigalugu imminnut ajoqusersinnaasarput. Amerlanerillu uagutsinnut sianertut ajornartorsiutitik pillugit oqaloqateqarneq ajorsimapput, Charlotte Berendt-Poulsen oqarpoq.

Inuusuttuaqqat 20-t ataallugit ukiullit 20.000-t tungaanut ukiut tamaasa Danmarkimi imminooriartarput. Amerlanerpassuillu ajornartorsiutitik pillugit oqaluussaqarneq ajorput.