Inuusuttut aallarnisaasut nersornaaserneqartut
Inuusuttut aallarnisaasut nunatsinneersut tallimat, inuusuttunik aallarnisaasunut Nordirlandimeersunut Finlandimeersunullu Finlandimi Levimi RYE Cool Youth Awardsimik taallugu unammeqataasut KNR-imi sapaatip-akunnerata siuliani oqaluttuaraarput. Kalaallillu inuusuttut marluk unammisitsinermi tassani nersornaaserneqarput.
Allattoq Mads Lynge
Nersornaaserneqartut tassaapput Naasunnguaq Lund, Narsameersoq, Jens-Christian Jacobsenilu, Nuummeersoq.
Naasunnguaq Lundip Kujataani hiisterneq pillugu isumassarsiaa, Jens-Christian Jakobsenillu "Paju"-mik taallugu nioqqutissanik internet aqqutigalugu inniminniilluni pisinermi pajussisinnaanermut isumassarsiaa nersornaaserneqarput. Greenland Businessip Facebookikkut nittartagaani tamanna atuarneqarsinnaavoq.
Aallarnisaaniat tallimat inuusuttut akornanni pingasut suliffeqarfimmik pilersitsiniarnerminnut atatillugu Cool Youth Awards-finalimi januaarip ulluisa 25-anni peqataapput.
Inuusuttut nunap immikkoortuini innuttakitsuneersut unammisinneqarput. 16-it 20-llu akornanni ukiullit aallarnisaaniartut matumani pineqarput.