Inuusuttunut umiatsiaararsortunut periarfissat isumalluarnartut
Nalunaarut taanna massakkut atuuttoq inuusuttunut umiatsiaararsorlutik aalisalerusuttunut akimmiffiusimavoq.
Nalunaarummimi tassani massakkut atuuttumi piumasaqaataavoq akuersissummik qinnuteqartoq ukiup siuliani akuersissuteqassasoq. Aalajangersagarlu taannarpiaq inuusuttut meeqqat atuarfiannit aneqqammersut imaluunniit ilinniakkaminnik naammassinneqqammersut tunngavissaqarluarlutik naammassisinnaasarsimanngilaat:
- Uummannami aalisarnermut piniarnermullu ilinniarfimmi ilinniarsimasut ilinniarsimanerminnut allagartaqaraluarlutik ajoraluartumik inatsisit malillugit akuersissummik tunineqarsinnaanngillat . Taamaammat taakkua eqqarsaatigalugit, inuusuttortagut pingaarnerutillugit, taanna nalunaarut allanngortipparput. Taanna inuusuttunut iluartorujuusussaavoq, Finn Karlsen radioaviisimut taama oqarpoq.
Aalisarnermut Naalakkersuisoqarfimmit ilisimatitsissutigineqarpoq inuusuttut umiatsiaararsorlutik aalisalerusuttut 80-it sinneqartut umiatsiaararsorlutik aalisarsinnaanermut akuersissummik qinnuteqaraluarlutik itigartinneqartarsimapput.
Aalisartorpassuit Aalisarnermut, Piniarnermut Nunalerinermullu Naalakkersuisoqarfimmit 2012-imi 2013-milu kukkusumik pineqarsoralutik inatsisartut ombudsmandianut naammagittaallioreersullu Naalakkersuisoqarfiup aalajangiisarneri misissuiffiginikuuai. Ombudsmandip taamanikkut misissuereernermini aamma apeqquserpaa Naalakkersuisoqarfik inatsisitigut tunngavissaqarnersoq ukiup siuliani akuersissummik peqarsimanissamut piumasaqaateqarnissaminut.
Taakkua saniatigut umiatsiaararsorlutik aalisartut aqutsiveqarfiit Qeqertarsuup Tunuata, Uummannap aamma Upernaviup avataaniittut, umiatsiaararsorlutik aalisakkanut tamanut akuersissutinik ukiut marlukkaarlugit tunineqartalissapput. Kisianni tassa Qeqertarsuup Tunuata, Uummannap aamma Upernaviup aqutsiveqarfiisa avataaniittut kisimik aalisakkanut tamanut akuersissutinik ukiuni marlunni atuuttussanik tunineqartalissapput