Inuusuttunut sunngiffik soqutiginarnerusoq ujartorneqarpoq

Ilaqutariit nukittuut pillugit ataatsimeersuarnermi siunnersuutit inuiaqatigiinnit atorluarneqarsinnaasut arlallit saqqummiunneqarput.

Siunnersuutit pinngorput meeqqat inuusuttullu immikkut ataatsimeersuartinneqartut kissaatigisaminnik saqqummiussinerat aallaavigalugu.

Pauline Platou eqimattaminnit sunngiffik pillugu siunnersuusiaminnik ima saqqummiussaqarpoq:

- Sumiiffinni tamani børnerådi imaluunniit assersuutigineqarpoq kommunalbestyrelsiaraq pilersinneqartariaqarpoq taavalu tassanngaanniit meeqqat illoqarfimmiit oqariartuutitik apuuttarlugit oqartussanullu taava aappaattut sunngiffitsialak tassani una eqqarsaatigineqarpoq atuarfitsialak peqareerpoq taassuma periusaasa assinganik trin for trin atorlugu soorlu angusamiit tullermut ingerlasarluni ittumik pilersitsisoqartariaqartoq taava pingajuattut meeqqat inuusuttullu aningaasaateqarfiat tassa taakkua inuusuttuaqqat meeqqallu qinnuteqarfigisinnaasaat pilersinneqartariaqarpoq fondterpassuaqareeraluartoq.”

Eqimattamiit aamma siunnersuutigineqarpoq Ilaqutariit ulloqartinneqartariaqaraluartut, soorlu anaanap ulloqarlunilu ataatap ulloqartoq ullorsiutini takuneqarsinnaasartoq. Ilaqutariinnik pingaartitsineq taamatut ersertinneqassagaluartoq Pauline Platou oqarpoq.

Aamma kommunet tamarmik isiginnaartitsisartunik atorfinittitsisariaqaraluarnerarpaat, taakkuami meeqqat inuusuttullu sunngiffimmi sammisassaqarnissaannut suliniaqataasinnaammata.

Soorlu aamma sunngiffimmi aaqqissuussisartoqartariaqarsorinartoq kissaatigineqartoq.

Nunaqarfiit illoqarfiillu tamarmik meeqqanut inuusuttunullu klubbeqarnissaat aamma anguniarneqartariaqarsorineqarpoq, ingammik aasakkut ammasartumik, aasakkummi feriarnerminni inuusuttut ornitassaarusimaartarmata ingammik isorliunerusuni.

Inuusuttut ornittagaat klubbit piorsaaffigalugillu aserfallatserneqartariaqartut Pauline Platoup aamma oqaatigaa.