Inuusuttunut sullissivik Nuummiittoq sullissilluarneruniartoq

Kommuneqarfik Sermersuup Nuummi inuusuttut sullinneqarnerat pitsaanerulersinniarpaat. 

Inuusuttunut sullissivik maanna inissiat ilaanni naqqup iluani sullissiveqartoq killilimmik sullissisarpoq. Tassa naqqup iluata inaasa mikivallaarneri pissutigalugit inuussuttunik oqaloqateqartarneq killeqartarluni taamatuttaaq aamma inuusuttunut arlalinnut suliniutinik assigiinngitsunik, soorlu aalajangersimasunik sammisaqartitsinerit allallu ajornakusoortarlutik.

Inuusuttunut sullissivik Nuummi atuartut angerlarsimaffigisimasaannut aappaagu nuunneqassaaq inuusuttunullu siunnersortimik atorfinitsitsisoqassalluni.

Taamaalliornikkut suliassat inuusuttunut attuumassuteqartut amerlineqassasut aamma inuusuttut sullissivimmut oqaloqatiginninnissamik innersuunneqarneq ajortut amerlanerit aggersarneqartalissasut Kommuneqarfik Sermersuumi Meeqqanut, Ilaqutariinnut Atuarfeqarnermullu ataatsimiititaliaq tusagassiuutinut nalunaaruteqarpoq.

- Inuusuttut inuunerminnik aallartitsilluarnissaat pingaartorujussuuvoq. Tamannalu pillugu tassa kommunalbestyrelsi tamarmiusoq siunnersuummut tassunga akuerseqataapput, Meeqqanut, Ilaqutariinnut Atuarfeqarnermullu ataatsimiititaliap siulittaasua, Poul Hansen Demokraatineersoq allappoq.

Ilinniartut angerlarsimaffigisimasaata allanngortinneqarnissaanut atatillugu inuusuttut pinerluuteqarsimasutut pineqaatissinneqarsimasut inissiisarfissaannik ilaneqassaaq.

Taamaalilluni Kommuneqarfik Sermersooq inuusuttunut pinerluuteqarsimasunut ullumikkut inissiisarfeqanngitsoq peqalissalluni.