"Inuusuttunut parnaarussivittaassaq" pisariaqartinneqaqaaq
Inuusuttut pinerluuteqarsimasunut 18-it inorlugit ukiulinnut neqeroorutaasartut sakkukitsuaraanngikkunik sakkortuupilussuusarsimapput. Inuusuttut pinerluuteqarsimasut ilaqutarsiartaatinneqanngikkaangamik, savaatilimmukartinneqanngikkaangamik inersimasuut sakkortuumik pinerluuteqarsimasut isertitsivimmeeqatigisarpaat.
Kalaallit Nunaata inuusuttunut 18-it inorlugit ukiulinnut ulloq unnuarlu angerlarsimaffiit isumannaaarsakkat siullersaannik sanaartortoqarnissaanik Inatsisartut aningaasaqarnermut ataatsimiititaliaata sisamanngormat akuersissutigaa.
Pinerluttunik isumaginnittoqarfiup pisortaata, Michael Stagep, taamatut aalajangertoqarnera iluarisimaartupilussuuaa:
- Nuannaarutigisupilussuuara, inuusuttunummi 18-it inorlugit ukiulinnut immikkut ittumik angerlarsimaffeqannginnera ukiorpassuarnimi unamminartupilussuusimavoq, naak pinerluttulerinermut inatsimmi taamatut neqerooruteqarnissatsinnik allassimagaluartoq.
Suliniulli maanna piviusunngortinneqartussanngorpoq.
- Allaanerulaarnera qularnanngilaq, Nunatsinnimi angerlarsimaffimmik taama ittumik siornatigut peqarnikuunngilaq. Pinerluttunik isumaginnittoqarfiup tungaanit pisariaqartitsisoqarpat naammattumik ikiuinissatsinnik neqerooruteqarusuttupilussuuvugut. Sulisut suliassanut nutaanut piareersarlugit immaqa ikiuussinnaavugut, pinerluttunik isumaginnittoqarfimmi pisortaq, Michael Stage oqarpoq.
Inuusuttunut angerlarsimaffiliortoqarsinnaaneranik periarfissat suleqatigiissiat 2006-miilli misissorsimavaat. Naalakkersuisoq Martha Lund Olsen, Michael Stage angerlarsimaffiullu siunissaa pillugu suleqataasut allat marlunngorpat ualikkut ataatsimiittussaapput.