Inuusuttunut inissiat pitsaanerit ujartorneqarput
Meeqqat inuusuttuaqqallu meeqqat atuarfianni pinngotsooratik atuarnissaannik naammassinnikkiartortillugit nunaqarfinniit illoqarfinnut atuariartortinneqarnerminni ineqarfigisartagaanni pissutsit minnerpaaffilerneqartarnissaata qularnaarneqarnissaa siunertaralugu, Inatsisartuni ilaasortap Inuit Ataqatigiinneersup Juliane Henningsenip siunnersuutaa; Inatsisartuni ullumi oqaluuserineqarpoq, Naalakkersuisunit partiinillu tamanit tapersersorneqarluni, aappassaanneerneqartigani Inatsisartut Ilinniartitaanermut Ataatsimiititaliaannut ingerlaqqittussanngorpoq.
-Nunaqarfimmiut meeqqat atuarfiannik naammassinnikkiartorlutik angajoqqaatik qimallugit nuutttartut inuusuttuaranngulernerup nalaani nakuugaluarunilluunniit avatangiisikkut pitsaasumik pineqarnissartik allatulli pisariaqartippaat, atuarfik ornigartik naammassillugu ingerlaqqinniassagunik, Juliane Henningsen tunngavilersorpoq.
Juliane Henngsenip siunnersuuteqarnermini ukioq 2002-mi ilinniagaqarneq pillugu nalunaarusiami ”Kikkut iliniagaqarpat”-mi saqqummiunneqarsimasoq, tassalu meeqqat nunaqarfimmeersut tassaasut ilinniagaqarniarnermikkut ajornartorsiornerusartut, tunngavilersuutigaa.
Aammattaaq Inuusuttut Inatsisartuisa inaarutaasumik aalajangersakkiaminni atuartut naammginanngeqisumik ineqartinneqarnerisa aaqqiviigineqarnissaannik oqariartuutaat Juliane Henningsenip tunngavilersuugaa, tamannalu Inatsisartunit tamanit tapersersorneqarpoq.
