Inuusuttunnguit biilinik aallarussisut
Nuup aqquserngisigut quiasaqisutigut nalunaaquttap akunneranut 100 kilometeri sinnerlugu biilinik ingerlarsortoqarsimavoq inuusuttunnguit biilinik tillittut politiiniit qimaammata.
Taama pisoqarpoq biilinik tillittut sukkasuumik Nuup aqquserngisigut ingerlaqattaareersut politiit unitseriaraluarmatigit. Politiilli erseqqissarpaat malersuisoqarsimanngitsoq.
Biilinik aallarussisut suli ulorianarnerusumik ingerlalernissaat pinngitsoorniarlugu politiit malinnileraluarnertik unitsissimavaat.
Kingusinnerusukkut biili SANAp silataani nassaaraat aammalu arfininngornerup ullaassaani inuusuttunnguit 15, 16 17-inik ukiullit tigusaralugit.
Taakku tillisimasutut unnerluunneqarput biilimillu ingerlatsitsisoq tamatuma qaavatigut allat inuunerannik ulorianartorsiortitsisimasutut unnerluunneqarluni.
Persuttaanerit sisamat Nuummi politiit sapaatip akunnerat naanerani aamma politiit orniguffigisariaqarsimavaat.
Arnat inuusuttut marluk Tullemutip silaani paalersimapput. Taakku saniatigut angut 30-nik ukiulik inuusuttunit 16-inik 18-inillu ukiulinnit Maximutip silataani saassunneqarsimavoq.
Arnat inuusuttoq 19-inik ukiulik aamma politiinut nalunaarutigineqarsimavoq arnamik 17-inik ukiulimmik annersaasimasutut kiisalu arnap 21-nik ukiullip inooqatini politiinut nalunaarutigisimavaa tillussimammani. Taama Nuup politiivinit Niels Nyvang nalunaarpoq.
