Inuusuttuaqqap tigusaanermini politeeq niuatigut kiigaa

Nukappiaaluit 16-inik ukiullik marluk ataasinngormat tigusarineqarput, taakku Tele-Postimut pingasunngormat kingullermik tillinniarsimasutut pasisaapput.

Tillinniartoqarmat oqarasuaatit angallattakkat 27.000 koruuninik nalillit tillinneqarput, naallu tillinniat tigusaareeraluartut oqarasuaatit angallattakkat pingasuinnaat politiit nassaarisisinnaasimavaat.

Innuttaasullumi ikiuukkallartillugik nukappiaaluit marluk politiinit ataasinngormat tigusarineqarput. Politiilli akersuuttariaqarsimapput.

Nukappiaaluimmi aappaa tigusaarusunnani akersuulluni aallartippoq. Ilaatigullu politeeq niuatigut allaat kiisimallugu. Allatut ajornarmat nukappiaaluk qulliliornartumik politiinit seqqitsarneqarpoq akersuukkunnaarmallu tigusarineqarluni. Politiit tusagassiuutinut taama nalunaaruteqarput.

Suliaq politiit inaarsaleruttorpaat, oqarasuaatillu angallattakkat tammaaneqartut eqqartuussisoqartinnagu ilaatigut nassaariniarneqassallutik.