Inuusuttuaqqat timersornermik soqutigisaqanngillat
Kalaallit Nunaanni Arsartartut Kattuffiat aamma Kalaallit Nunaani Assammik Arsartartut Kattuffiat 14-nit tikilligit ukiulinnik ilaasortaqarneruvoq , 15-niillu 18-it tikilligut ukiulinnik ilaasortakinnerulluni.
MIPI-p nalunaarusiornermini aamma kulturi sammivaa, maluginiarpaalu meeqqanut inuusuttunullu kalaallisut atugassiat amigaatigineqartut.
Ukiuni 2002-miit 2007-mut inuusuttunut atuagassaqqissunik marlussunnik ukiumut saqqummersitsisoqartarpoq.
Meeqqat inuusuttullu sumiiffinni katersugaasivinnik atuinerat aamma aalaakkaajartuinnarpoq, katersugaasivinnut pulaartartut ukiumut 3.000-inngorsimallutik. Pulaartartut amerliartornerat atuarfeqarfiit katersugaasiviillu suleqatigiinnerulernerannik aamma pissuteqartoq, MIPI-p nalunaarusiaani erserpoq.
Nalunaarusiat ukioq allortarlugu saqqummersartut assigiinngitsunik sammisaqartarput, ukiormanna sammisaq tassaalluni timersorneq kulturilu, taakkunani neqeroorutinik meeqqat inuusuttullu atuisinnaanissamut periarfissaat misissorneqarsimalluni. Nalunaarusiaq ualeru saqqummiunneqassaaq.
