Inuusuttuaqqat 16-t ataallugit ukiullit niuertarfinni sulisut amerlavallaaqaat, tamanna iliuuseqarfigineqartariaqarpoq, taama oqarpoq, Nuummi SIP-p immikkoortortaqarfiani siulittaasoq Karl Olsen.
- Takusinnaasatsitut niuertarfinni iseraangatta inuusuttuarannguit arlalissuit sulisorineqartartut takusarpavut. Taava imaappoq, annertoorujussuarmik ilaatigut sulisinneqartut malugineqarsinnaasarpoq, imaluunniit niuertarfinnut iseraanni ulapaangaatsiartinneqaqisut takuneqarsinnaasarlutik, Karl Olsen NSIP-mi siulittaasoq oqarpoq.
Taanna aamma oqarpoq, niuvertarfinnut iseraangami inuusuttut ilaat qassinik ukioqarnersut aperimisaartarsimagini. Taakkulu ilaat 14-t 15-llu akornanni ukioqarlutik akisarsimasut.
- Isumaqarpugut taamatut ukiullit atuarfimmi atuarnertik naammasseqqaarlissuk, anguniakkaminnillu angusaqarunik taava niuertarfimmi sulerusukkunik sulisinneqarlik. Massakkut eqqarsaatigalugit ineriartornerminni taamak siusitsigisumi aammalu taamak sakkortutigisumik sulisinneqarunik piumassuseerukkaluttuinnassapput aamma kingusinnerusukkut.
- Qanormi tamanna iliuuseqarfigineqarsinnaava?
- Tamatuma iliuuseqarfigineqarsinnaanissaa annertoorujussuuvoq, isumaqarpugullu suliffeqarfiit niuertarfeqarfiilluunniit sulisuminnut tunngasumik politikkeqarunik aamma ilinniartilluarlugit atortariaqaraat.
Kalaallit Nunaanni sullivinni avatangiisit pillugit inatsimmi § 46-mi imm. 2-mi ima allassimasoqarpoq:
“Inuusuttut 15-t inorlugit ukiullit imaluunniit pinngitsoorani atuartussaanermit pineqartut suliani sulisorineqassanngillat”.
Issuaaneq naavoq.
Tamanna pillugu Pisiffimmi allaffissornikkut pisortaq Mikael Østergaard aperaarput sooq inuusuttuaqqanik taama amerlatigisunik sulisoqarnersut.
- Taamatut soorunami isumaqanngikkaluarpugut, kisianni ilumut pisiniarfitsinni inuusuttuararpaalunnik sulisoqarpoq. Tamannalu pissuteqarpoq, sivisuumik ammasarnitsinnik, tassami sulisorineqarsinnaasut qitornallit meeqqerivimmullu qitornaminnik aallertussat pinngitsoortariaqartarpagut inuusuttunillu taarsertarlutigit, Mikael Østergaard nassuiaavoq.
Taannalu erseqqissaavoq, ilaqutariinnik pilersugaqartut unnukkut arfineq-pingasut qulingiluallu tungaannut sulerusuttanngitsut.