Inuusuttuaqqat soqutigisaqanngitsut pisiniartitsisut
Ilulissani Atuisartut ataatsimiititaliaata pisiniarfinni kiffartuussisarnerup pitsaannginnera qatsuppaa, inuusuttuaqqallu ilinniarsimanngitsut ilaatigut soqutigisaqarpasinngittarneri, ilisimasakittarneri allaallu soqutigittaappaluttarneri qatsunneqarsimallutik.
Tamatumunnga atatillugu Nunatsinni Atuisartut Siunnersuisoqatigiivisa siulittaasuat Rigmor Thaarup Høeghp pisiniarfiit ima tinnersarpai:
- Inuusuttuaqqammi sulisorineqartartut ajornartorsiutaappat?
Suliffimmi sunaluunniit aatsaat misileqqaaraanni nalorsakujuttarneq pissusissamisuuginnartoq unnerpaa.
- Pisiniarfinnili akisussaasut sulisuminnik ilinniartitsisannginnerat akuerineqarsinnaanngilaq, taamalu inuusutsigisunik sulisoqarniarunik ilinniartitsinissamik akisussaaffitik aamma naammassisinnaasariaqaraluarpaat, Rigmor Thaarup Høegh taama allappoq.
- Pisiniarfinnimi suliniaraanni kiffartuussilluarnissaq avaqqunneqarsinnaanngilaq. Tamannalumi pisiniarfinni qullersaasut akisussaaffigimmassuk sulisutik atuisuminnut pitsaasumik sullissisalernissaannik ilinniartitsisariaqarput.
- Taamaammat pisiniarfiit inuusuttuaqqanik sulisullit pitsaasumik sullissisalernissaat angutserlugu immikkut iliuuseqarnissaat kaammattuutigerusuppara, Rigmor Thaarup Høegh nunatsinni pisiniarfiutilinnut taama tinnersaavoq.