Inuusuttuaqqat Nunavumi atuarfik ikuallatseriaraluaraat

Nunavumi illoqarfimmi Cape Dorsetimi Peter Pitseolaap atuarfia siorna septembarip qaammataani ikuatsinneqarpoq. Atuarfik nungulluni ikuallappoq atuartullu 150-iusut illuni allani atuartinneqartariaqarsimapput.

Atuarfik nutaaliaasupilussuaq atortorissaartupilussuarlugu taarserneqassappat 160 millionit koruuninik akeqassaaq sanaartorneralu ukiunik arlalinnik sivisussuseqassalluni.

Taamatut pisoqarnerata kingorna illoqarfimmi alapernaarsuisoqarpoq. Ikuallatsitsisartulli inuusuttuaqqat sisamat, 13-it 16-illu akornanni ukiullit, ajornartorsiutaaqqilerput. Meeqqanut ukiukitsunut atuarfik Sam Pudlaap atuarfia tamatumunuuna ikuallatseriaraluarneqarpoq.

Atuarfiup iluani ikuallatsitsisoqarpoq qujanartumilli ajoqusernerit annertuallaarsimanngillat.

Inuusuttuaqqanit sisamaasunit marluk parnaarussaagallaqqapput. Taakkulu susassaaleqillutik taamaaliorsimanerarput.