Inuusuttuaqqat nalunaarsorneqalerput
Nuummi inuusuttuaqqat atitik sumi najugaqarnertik angerlarsimaffimmilu oqarasuaatimi normuat ungdomsklubbini nalunaarsorneqartalissapput.
Taakkuinnaassanngillalli, ilami angajoqqaami aqqi aamma ilanngullugit nalunaarneqartalissapput.
Inuusuttuaqqat klubbiliartartut paasissutissaataat klubbini pigineqalernissaat pisariaqalersimavoq inuusuttuaqqat akunnerminni persuttaatoqaannartarmat aalakoortoqartarluni ikiaroortoqartarmallu.
- Pisariaqarluinnarpoq taamaattoqartillugu angajoqqaat piaarnerpaamik attavigisarnissaat inuusuttuaqqat ornittagaanni Inneruulani pisortaagallartoq Tina Silassen oqarpoq.
Sapaatip akunnerata siuliani Inneruulani diskotekertoqarmat, inuusuttuaranngulersut inuusuttuaqqallu 200-t missaaniittut isersimasimapput, isersimasinnaasullu marloriaataat sinnerlugit isersimasimapput.
Inuusuttuaqqallu ilaat sulisut akornanni toqutsisoqarnissaanik siorasaarisimapput, naggataatigullu politiit qaqquneqartariaqarsimapput.
Nuummi inuusuttuaranngulersut inuusuttuaqqallu aqqanilinniit 21-nik ukiullit ungdomsklubbiniittarput.
