Inuusuttuaqqat imerniartarfinni ajornartorsiutaasut
Qaqortumi imerniartarfiit silataatungaanni sapaatip akunnerata naanerani ukiukinnerusut ajornartorsiutaanerat 2010-mi annertuseriarsimavoq. Taama Kujataamiu allappoq.
Taamaattumik imerniartarfinnik Pubben-imik, Arctic Cafe-mik Hotellets bar-imillu piginnittut ajornartorsiummik aniguiumallutik iliuuseqartariaqalersimapput.
Imerniartarfinni pisortaq, Jim Riis, Kujataamiumut ima oqarpoq:
- Sulisutta isertut 17-inik affarmillu imaluunniit 18-inik ullormillu ataatsimik ukioqarnersut takunissaat ajornartorsiutiginerulersimavaat, taamaattumik 2011-mi ajornartorsiummit aniguiniarluta qanoq iliuuseqartariaqarpugut, Jim Riis oqarpoq, nangillunilu:
- Ingammik ajornartorsiutaapput inuusuttut arlaqanngitsut ataatsimoorlutik imerniartarfiit silataanni perulluliortartut, ilaalu persaqqutsillutik iserniartartut.
Jim Riis-ip ilanngullugit kommune politiillu kajumissaarpai imerniartarfiit eqqaanni, ingammik sapaatip akunnerata naanerani, inuusuttuararpassuit eqiteruttarnerat qanoq iliuuseqarfigissagaat.
- Ingammik aalakoorpallaartut isersimasunut allanut kamanaattuliortarneri ajornartorsiutaapput, angerlarniartunullu imaluunniit silataanut pujortariarniartunut ajornartorsiortitsisarlutik, Jim Riis, Arctic Cafe-mut, Pubben-imut aamma Hotel Qaqortumut pisortaq oqarpoq.
Jim Riis-ip ilanngullugu Kujataamiumut ilisimatitsissutigaa, maannamuugallartoq inuusuttuaraq ataaseq 17-inik ukiulik pingajussaanik mianersoqqussummik tunineqareersimasoq, taassumalu pingajussaanik mianersoqquneqarnerata kinguneraa aatsaat 19-inik ukioqalereeruni imerniartarfimmut iseqqusaasinnaalernissaa.