Inuusuttuaqqat cigaretsisiniutsittarput
Nunatsinni pujortarnermik 1998-imiit 2005-imut misissuisarnerit kingulliit takutikkaluaraat pujortartartut 28 %-ngajammik ikileriarsimasut, kalaallit meerartagut inuusuttuarartagullu nunani allanut meeqqanut inuusuttuaqqanullu naleqqiullutik pujortarnerujussuupput. Taama 1994-imiit 2002-mut meeqqat atuarfianni atuartut peqqissusaat pillugu misissuinermit nalunaarusiaq qanittukkut saqqummersoq saqqummiussaqarpoq.
Nunatsinni pisiniarfiit, inuusuttuaqqanut 18-inik ukioqalerimanngitsunut ukioq manna januaarip aallaqqaataaniit cigarettinik tuniniaaqqusaajunnaarput, taamaalillunilu inuusuttuaqqat pujortartartut cigarettisiniarsinnaajunnaarput. Inuusuttuaqqat pujortartartut paasiniaaffigaagut. Tobias 15-inik ukiulik 13-inilli ukioqarluni pujortartalersimavoq, cigaritsiniarsiannaajunnaarami pisiutsitittalersimavoq, kikkunnimmita pisiniutsitittarpa?
- Massakkut angajoqqaakka pisitittarpakka. Tobiasip pujortartarnini angajoqqaami ajorinngikkaat oqarpoq. Pujortarunnaarusuppoq nalulluguli qanoq. Pujortarnerup navianaqutai iluamik ilisimannginnerarpai.
Aviaq 15-inik ukiulik, 12-nik ukioqarluni pujortartalersimavoq, pisiniarfinnut isiinnarluni cigaretsisiniarsinaanera aamma killeqalersimavoq, qanoq ilillunimita taanna cigarettissaminik pissarsisarpa?
- Kammalaatinnut pisiniutsittarpunga imaluunniit nammineq. Nammineerluni cigarettisiniarnissani ajornannginnerarpaa, pisiniaraangami ukiuminik aperineqartarani oqarpoq. Aviap ullormut cigarettit qulit missaat nunguttarnerarpai pujortarunnaarnissanili aamma eqqarsaatigalugu. Oqaluttuarpoq pujortarnini angajoqqaami nuannarivallaanngikkaat, soqutigivallaarnaguli aamma.
Berti 14-inik ukiulik 12-nik ukioqarlunili aamma pujortartalersimavoq. Pujortarlersimanini oqaluttuaraa:
-Anaanakkukka kammalaatikkalu pujortartarmata pujortartalerpunga, massakkuli pujortartakkakka ikiliartortillugit uninniarsarivunga. Berti nammineerluni cigarettisiniartanngilaq kammalaatiminut 18-leereernikunut pisiniutsittarnerarpoq. Nammineq cigarettisinissi assut ajornarnerulersimanerarpaa.
Nunatsinni atuartut 1994-imiit 2002 ilanngullugu peqqissusaannik misissuinermi saqqummiunneqarpoq meeqqani inuusuttuaqqanilu aqqanilinniit 17-inut ukiulinni pujortartartut niviarsiaqqat nukappiaqqanit amerlanerusut, atuartullu annerit affaat ullut tamaasa pujortartartuusut.
