Inuusuttuaqqanut inissiisarfik nutaaq paarnaarussiviussanngilaq
Angerlarsimaffik Isikkivik isertitsiviussanngilaq, isumaginninnermilli perorsaanermillu angerlarsimaffittut ingerlassaaq. Pillaasarnissaq pineqarani perorsaanikkut ilorraallu tungaanut aqqutissiuussiniarluni iliuutsit aallaaviusussapput. Pineqaatissinneqarsimanertik naammassigunikku nammineersinnaassuseqarlutik inuiaqatigiinnut uteqqinnissaat siunertarineqarpoq.
- Inissiisarfimmi inuusuttuaqqat sulisullu peqqinnartumik attaveqaqatigiittassapput sammisassaqartassallutillu, taamaalilluta inuusuttuaqqat siunissami silatusaartumik inuuneqalernissaanik kommune angajoqqaallu suleqatigalugit aqqutissiuutissavagut, Angersimaffik Isikkivimmi pisortaq Tue Jensen oqarpoq.
Inuusuttuaqqanut pinerluuteqarsimasunut 15-niit 18-nut ukiulinnut inissiisarfik ullumi atoqqaarfissiorneqartoq arfineq-pingasunik inissaqarpoq. Immikoortunullu marlunnut avinneqarsimalluni. Immikoortoq siulleq sisamanik inissaqartoq isumannaallisagaavoq, aappaalu sisamanik inissaqartoq ammasuussaaq.
Inissiisarfimmi sulisut Massakkut arfineq-pingasuupput. Inuusuttuaqqallu marluk inissiisarfimmut inissinneqareersimallutik. Inuusuttuaqqanik arfineq-pingasunik inissiisoqarpat sulisut 17-it pisariaqartinneqassapput.
Angerlarsimaffik Isikkivimmi pisortaq isumaqarpoq inissat arfineq-pingasut naammattut.
- Kalaallit Nunaanni Pinerluttunik Isumaginnittut, ukioq 2012-imi nalunaarutiginikuuaat inuusuttuaqqat 18-nit inorlugit ukiullit tallimat inissiisarfinniissimasut. Isumaqarpunga inissat arfineq-pingasut piffissami matumani naammakkallartut, Tue Jensen oqarpoq.
Meeqqat inuusuttuaqqallu pinerluuteqarsimasut isumaginninnikkut inatsisitigut FN-illu meeqqat pisinnaatitaaffii pillugit illersorneqarnissaat pingaaruteqartinneqarpoq. Inuusuttuaqqat inersimasunit pinerluttunut ingalassimatinneqarnissaminnut sunnernerlunniarneqartannginnissaminnullu pisinnaatitaaffeqarput, taamaattumillu pineqaatissinneqarsimanertik pissutigalugu inersimasut pineqaatissinneqarsimasut akornanniittariaarullutik.
Inuusuttuaqqanut pinerluuteqarsimasunut inissiisarfik pilersinniarnerani aningaasat 5 millionit koruunit aningaasartuutigineqarput. Inuusuttuararlu ataaseq ulloq unnuarlu inissiisarfimmiinnerani 2973 koruuninik akeqarpoq.