Inuusuttorpassuit tukkaanneqarlutik ajunaarput

Cambodjami ukiumoortumik festivalertoqarnerani ikinnerpaamik 349-t tukkaanneqarlutik ikaartarfiit ilaanni ippassaq unnukkut iuivernersuaqalermat toqutaapput, 400-llu aqqunartiterlutik.
novembarip 23-at 2010 05:48

Festivalerneq taanna imaani pisarpoq. Nutaarsiassaqartitsivimmi Ritzauimi tamanna ilisimatitsissutigineqarpoq.

Seqinersiutit atisallu qalipaatigissaaqisut Cambodjami ikaartarfimmi ameqisumi, Phnom Penhimi, inuit nuannattut untritillit arlaqartut tummaarineqarsimalutik toqungasut akornanni ullaaq manna takussaapput.

Ikaartarfimmi, imaani festivalimik taaneqartartup pinerani suli naneruusersorneqarsimasumi, qalipaatigissaartunillu qullilersorneqarsimasumi, ippassaq unnukkut uivertoqalermat toqutaasimasut sakkutuut politiivisa misissorpaat. Festivali aallartimmat inuit millionilippassuit aqqusinerni nuannattorsuupput.

Inuusuttorpassuit - suli assuutilisaarrattut - timaat toqungasut ikaartarfimmiit qimagussorneqarmata inuppassuit qissallutik malinnaapput. Toqungasorpassuit tassaapput inuusuttuaqaat, niviarsissanik aamma ilaqarlutik.

Festivalertorpassuit inuusuttut nuannateqisut qeqertamut festivalertoqarfiup akianiittumut ikaartarfikkoorniartillugit uierneq aallartissimavoq - qeqertami orninniagaanni tusarnaartitsisoqarlunilu, nerisassaarniartoqarlunilu serminik eqqumiitsulianik takutsisoqarsimavoq. Nalliuttorsiorpalaarnerli tassanngaannaq uiernermut sanguvoq.

- Ikaartarfikkoorluta Diamond Islandimukartilluta inuit imminnut ajattaatilerput. Nilliarrapput, arpaliukkamillu imminnut nanertuutilerlutik. Uanga aamma orluvunga. Nikuitinneqaramali taanna annassutigaara. Ilarpassuavut imaanut aamma pissikaapput, takunnittut ilaat, 23-nik ukiulik, Kruon Hay, nutaarsiasasqartitsivimmut AFP-mut oqaluttuarpoq.

Ministeriuneq Hun Sen pisoq alianartoq pillugu utoqqatsereerpoq, misissuisoqarnissaalu naalakkiutigalugu.