Nersornaat, Nordic Pioneer Prize, kattuffimmit Nordic Safe Cities-imit nunani avannarlerni inuusuttunut, inuiaqatigiinni avissaartuunnissamut, uumissuinissamut immikkoortitsinissamullu akiuiniarnermi immikkut suliniuteqarsimasunut tunniunneqartarpoq.Assi: Privatfoto.

Inuusuttoq nersornaatisisoq pilluaqquneqartoq

Naligiissitaanermut politikkikkut akisussaasup Seqininnguaq Qitura Lynge Poulsenip paqumigineqartut inuiaqatigiinni eqqartorneqarnissaanut suliniuteqartarnera pillugu nersualaarpaa.

Svenskit Københavnimi aallartitaqarfiat sapaatip akunnerani kingullermi nalliuttorsiorpalaartumik katerisimaarfiuvoq. 

Tassani inuusuttut nunani avannarlerneersut sisamat nunat avannarliit inuusuttunut nersornaasiuttagaannik, Nordic Pioneer Prize 2021-mik, naligiissitaanerunissamut aamma nunani avannarlerni inuit akornanni toqqissisimanerunissamut suliniuteqarsimasutut nersorniarneqarput.

Nersornaatisisut ilagaat Nuummeersoq Seqininnguaq Qitura Lynge Poulsen. Taanna eqqumiitsuliortuuvoq nunallu inoqqaavisa isumaanik siaruarterisartulluni, ilaatigut nunasiaataajunnaarsitsiniaanermi tarnikkut peqqissuseq, ilinniartitaanissarlu ukiuni kingullerni suliniuteqarfigisimallugu.

AAMMA ATUARUK Seqininnguaq nersornaaserneqartoq

- Siullermik pingaarnertullu Seqininnguaq pilluaqquarput. Inuusuttut qulequttanut paqumigisanut akiuiniarnerat takullugu nuannaraara, neriuppungalu Seqininnguaq allanut, inuusuttuuppata utoqqaappatalu, inuiaqatigiinni eqqartugassat ajornakusoortut oqallisiginissaannut ammaassinissamut isumassarsiuiumaartoq, Naaja H. Nathanielsen naligiissitaanissamut naalakkersuisoq oqarpoq.

Naaja H. Nathanielsenimmi oqarnera naapertorlugu suiaassutsit atoqatigiittarnerlu suli inuit tamat politikerillu akornanni oqallisaasariaqarput, oqaloqatigiinneq immikkoortitsinissamut akiuiniarnermi sakkussaammat pingaarutilik.

- Kisianni siulliulluni alloriarnissaq aamma paqumigisat pillugit oqallisilernissaq ajornakusoortinneqartarpoq. Taamaattumik Seqininnguup suliniutaasa akuersaarnissaat ingerlatsinissamullu kajumissarneqarnissaa pingaaruteqarpoq, oqarpoq.

AAMMA ATUARUK Nipilersortartoq Neriusaarlu kulturilerisunut nersornaasiuttakkamik tunineqartut

Nersornaat, Nordic Pioneer Prize, kattuffimmit Nordic Safe Cities-imit nunani avannarlerni inuusuttunut, inuiaqatigiinni avissaartuunnissamut, uumissuinissamut immikkoortitsinissamullu akiuiniarnermi immikkut suliniuteqarsimasunut tunniunneqartarpoq.

Seqininnguaq Qitura Lynge Poulsen tarnikkut nappaatillit suiaqatiminoortartullu sinnerlugit suliniuteqarnini pillugu Namminersorlutik Oqartussat inuiattut ullorsiornitsinni kulturikkut nersornaasiineranni aamma kajumissaaserneqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat