Inuusuttoq eqqakkanik katersisoq: Sooq eqqaaviit atortanngilisigit?
Upernarpoq. Nuummi aput aakkiartorpoq, aqquserngit pinngortitarlu aputaarukkiartulerlutik.
Apummullu qalligaasut cigarettit kimmivikorpassui eqqakkallu erserput. Nuullu aasariartornerani taama minguutigisoq erseraluttuinnarpoq.
Taamaammat 18-nik ukiulik Klaus Jeremiassen eqqakkanik sunngiffimmini katerserusulersimavoq.
Ukioq ataasinngortorsiortoq
Ilulissani eqqakkanik Sapaammi maajip ulluisa quliganni katersisimanerni ukiup ataasinngornera malunnartikkumasimavaa.
Taamanikkut 17-inik ukioqarluni Nagdlúnguup angutitaanni arsartartuuvoq.
Unammersuarnermi sølvimik ujaminnappoq, kingornalu piffissaqaleriataarpoq.
- Sungiusanngikkaangama piffissaqaleriataarpunga. Sapaataallunilu silagissoq eqqarsalerama: Immaqami eqqakkanik katersiguma, Klaus oqaluttuarpoq.
Poorsuit tallimat eqqakkanik ulikkaarlugit
Nuummi najugaqarluni GUX-imi maannakkut ilinniartuuvoq.
Sapaatit akunnerata naanera kingulleq aamma silagippoq, sapaataalluni Klausilu sungiusarnissamik pilersaaruteqanngilaq.
Poorsuarnik nassarluni eqqakkanik GUX-ip eqqaaniit ullup qeqqanut qeteqquttoq katersilerpoq.
Nuup Nuussuullu akornanni 400 vej-imi akunnerit sisamat qaangiuttut nikorfavoq.
Poorsuit tallimat eqqakkanik ulikkaarsimavai.
Ukiut tamaasa taamaattunik takusarami, eqqaaviit atortarnissaannik kaammattuivoq:
- Oqarusunnarami: Sooruna eqqaaviit atorneq ajorisi, taamak ajornartigigami? Isigikatannarsisaramik, ingammik cigaretsit kimmivikorsui, Klaus oqarpoq.
Poorsuit GUX-imut nassarpai. Tassani illorsualerisup poorsuit eqqaavimmukaatissagai isumaqatigiissuteqarfigaa.
Pinngortitap utertitsisarnera
Eqqakkanik katersinermini 50 øremik nassaarpoq. Nuummi aqqusinermi saliilaarsimanerminut akissarsiatut isigaa.
Aali nunatsinni Nuuk illoqarfiit annersarigaat, eqqagassanik katersinera 50 øriinnarmik akilisoq, ikasarluni oqarpoq.
Ilulissanimi eqqakkanik siornami katersigami 500 koruunimik nassaarsimagami.
- Taamanikkut Ilulissani eqqakkanik katersereerlunga Facebookikkut piaaralunga allannikuugama pinngortitap utertiffigigaanga, Klaus oqarpoq.
Klaus Nuummi eqqakkanik sapaatit akunnerata siuliata naanerani katersimmat inuit aamma arajutsisimanngilaat. Facebookikkut assimik ivertitsisoqarsimavoq, taannalu 1.300 sinnerlugit like-rsimavaat oqaasertalersorneqarluarlunilu.
Taava arnaq aamma sodavandimik pajuppoq. Tamanna Klausip eqqakkanik katerseqqinnissaminut kaammattuutigaa.
- Eqqakkanik katersigaangama inuit kaammattorluarpaannga. Nuannersunik oqaasertalersuipput qungujulaarlutillu. Naammassigama arnap sodavandimik pajuppaanga.