Runo Fencker Noahsen qinersissamaarpoq, taassumali inuusuttoqatimik ilaat sooq qinersissamaannginnersut paasisinnaavai.Assi: KNR

Inuusuttavut qinersissamaanngitsortaqartut: Politikerit immaqa tatigiuminaatsikkaat

Inuusuttatsinni ikittuinnaat Folketingimut qinersissamaartut, KNR-ip isumasiusitseqqammernerani erserpoq. Soorliuna qinersissamaanngitsut? KNR-ip ilinniartut inuusuit sisamat tamanna pillugu isumasiorpai.

Inuusuttatta 18-it 29-llu akornanni ukiullit pingajorarterutaannaasa missaat Folketingimut novembarip aallaqqaataani qinersissamaartut, KNR-ip isumasiuititseqqammernerani erserpoq.

AAMMA ATUARUK Ilisimatooq isumasiuineq pillugu: Siumut siuariarpoq, sulili isumannaarneqanngilaq

Ilisimatusarfimmilu ilinniartuni sisamanik tamannarpiaq pillugu sisamanngormat oqaloqateqarpugut. Oqaloqatigisattalu inuusuttavut Folketingimut sooq qinersissamaanngitsortaqarnerannik isummersuutaat assigiinngillat.

 

Nina Johansen, isumaginninnermut semesterit tallimassaannik siunnersortinngorniaq

Folketingimut qineqqusaartut malinnaaffigaagit?

-  Naamik.

Sooruna?

- Piffissaqarfiginngittutut misgigama.

Qinersissamaarpit?

- Naamik.

Sooruna?

- Malinnaanikuunanga qinerserusunnginnama nalullugit suut siunertarineraat annermik.

Qinerserusulernissannut susoqartariaqarpa?

- Uanga namminerminiiginnarsoraara qinerserusunnissara.

Inuusuttatta pingajorarterutaasa missaat qinerserusuttanngittut, isumasiuisitsinitsinni erserpoq. Tamanna sumik peqquteqarsoraajuk?

- Inummi namminiiginnarsoraara, qinerserusunnersunga imaluunniit qinerserusunnginnersunga.

 

Ole Nathanielsen, isumaginninnermut siunnersortinngorniaq

- Aap, Facebookkikkut liverlutik qineqqusaaraangamik, taavalu KNR-ikkut aallakaatikkaangamikkit malinnaaffigisarpakka.

Sooruna malinnaavit?

- Tassa kalaallit Danmarkimi sinniiseqarnissaat pingaarsorigakku, Folketingemi ilaasortat nunatsinneersut marluk nunaqavissunut kalaallinullu Danmarkimi najugalinnut illersuisuummata.

Inuusuttatta pingajorarterutaasa missaat qinerserusuttanngittut, isumasiuisitsinitsinni erserpoq. Tamanna sumik peqquteqarsoraajuk?

-  Politikerit imminnut qineqqusaatilillaraangamik aamma pissaaneqarniunnersuaq pigisaramikku. Oqarluartaarnerit taavalu paasissutissat pisviusut aallavigivallaarnagit ingerlasarneri aammalu soorlu misigissutsit aallaaviginerullugit qineqqusaarlutik.

 

Inuuna Møller Lynge, peqqissaasunngorniaq

Folketingimut qineqqusaartut malinnaaffigaagit?

- Naagga, qineqqusaartut malinnaaffiginngilakka.

Qinersissamaarpit?

- Naagga, Folketingimut qineqqusaartut nalinnaaffiginnginnakkit qinersinianngilanga.

Qinerserusulernissannut susoqartariaqarpa?

- Politikerit akornanni immaqa ammanerusumik takutitsineq, ammanerusumik ersarittumillu oqariartuutit - taakkua.

 

Runo Fencker Noahsen, inuussutissarsiornermi aningaasaqarnermut bachelorinngorniaq

Runo Fencker Noahsen qinersissamaarpoq, soorlu qinersissamaarnerluni nassuiaavoq:

- Naammaginngisaqaraanni iliuuseqarfigisariaqarpoq, taamaammat qinersisarnissaq pingaaruteqarpoq, naammaginngisammi qinersininikkut iliuuseqarfigineqarsinnaanerat pingaaruteqarmat.

Inuusuttatta pingajorarterutaasa missaat qinerserusuttanngittut, isumasiuisitsinitsinni erserpoq. Tamanna sumik peqquteqarsoraajuk?

-Politikerit assigiinngitsut siuttuusimapput, ukiunili kingullerni allanngortoqarujussuarnikuunngilaq. Taamaammat inuusuttut misigisinnaapput qinersisaraluarlutik kissaatigisamittut allanngortoqarneq ajortoq. Tassa politikerit immaqa tatigiuminaatsittarpaat.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl