Inuusukaat sunniuteqarnissaat pissanngatigineqarpoq

Julia Parsip, 38-nik ukiullip, Air Greenlandimi siulersuisunut siulittaasutut ippassaq qinerneqarneratigut, taavalu peqaavata, tassa Michael Binzerip, pisortaaninngorneratigut, oqarsinnaavugut kinguaariinnik malunnartorsuarmik nikittoqartoq. Skandinaviami timmisartortitseqatigiiffinni pissanngatigineqalerpoq, Air Greenlandimi taama inuusutsigisunik pisortaqalernera timmisartuutileqatigiiffimmut qanoq sunniuteqassanersoq. Taama allappoq nutaarsiassaqartitsivik, Travel People.

Travel People naapertorlugu, Michael Binzer oqamisaarsimavoq, USA-mukartitsisarnissat amerlanerusunik aqqutissarsiuunneqassasut, immaqalu aamma Londonimut toqqaannartumik timmisartuussisoqartalernissaa eqqarsaatigineqarsinnaasoq. Baltimorimukartitsisalernissarli qanoq akilersinnaatiginersoq utaqqimaarneqaqqaasaaq, USA-mukartitsisarnerit amerlisarneqannginneranni.

Londonimukartitsisarnissaq eqqaassagaanni marlunnik peqquteqarpoq. Michael Binzerilu naapertorlugu, Kalaallit Nunaata Londonillu akornanni angalasalernissaq pingaaruteqarluinnarsinnaavoq. Kisianni Europap Kujataaniit Qeqqaniillu angalasussat aamma Kalaallit Nunaannukarniarunik Tuluit Nunaannut iluatsillugu aqqusaaqqaarluarsinnaapput, Air Greenlandimi pisortaanertaaq oqarpoq, periarfissallu tamakku siulersuisut siulittaasortaavannut saqqummiunniarpai, atorfittaamini juunip ulluisa aallaqqaataanni aallartinniariaruni.