Inuussutissat pillugit isumasioqatigiittoqalerpoq

Nunani allani Inuussutissat pillugit ilisimatuut tunisassiorfissuarneersullu saqqummiussisussanut ilaassapput, Maniitsumi inuussutissat pillugit Piorsaavimmi, nunatta inuussutissatigut tunniussinnaasai nunatsinneersut allat peqatigalugit isumasioqatigiillunilu takutitsisoqarnerata nalaani , tamanna ingerlanneqassaaq marsip ulluisa 21-anni 22-annilu.

Isumasioqatigiinnerup qulequtaraa inuussutissaativut qanoq nutaaliarisinnaanerivut. Tassani isiginiartussaavagut nunatta inuussutissatigut tunniussinnaasai - kisianni aamma ilikkagaqarusuppugut, ingammik inuusutissatigut ilisimatusarsimasunit aammalu inuussutissanik tunisassiorfissuaqarnikkut, Ib Goldbach nassuiaavoq.

Ib aperaara, ullumikkut suut nunatsinni kukkussutigisarnerivut, akivoq, ajornartorsiutiginerpaasaripput tunisassianik naammattunik pilersorneqannginnerput, appaatut tunisassianik nutaanik avammut assartuisoqarneq ajornera- assersuutigalugu Island-imisut aqqissuussinissamut periarfissaqannginnatta, taamaattumik Air Greenland, Royal Arctic Line –lu isumasioqatigiinnermi peqataatitaqaqqullugit allaffigineqarsimasut, Ib Goldbach nangilluni nassuiaavoq.

Isumasioqatigiinnermi peqataasunit saqqummiunneqartut isumassarsiat siunnersuutillu oqallisigineqartussapput, ima agguataarlugit, siullertut eqqartorneqassapput inuussutissanik tunisassiassanik pilersorneqarneq, aappaatut, ineriikkanik tunisassiat saniatigullu allat tunisassiat, pingajuattut, igitassaagaluanik iluaquteqarluni tunisassiorneq kiisalu sisamaatut inuussutissanik assartuineq.

-Isumasiortitsinerup nalaani eqimattakkuutaat aalajangersimasumik qulequtamik wokshop-ertillugit sulisinneqassapput, taavalu sisamanngornermi isumasioqatigiinnerup ulluata naggataani nalilersuinerit aalingiinerillu pissapput, Ib Goldbach oqarpoq.

Norgemiut, danskit savalimmiormiullu isumasioqatigiinnermi peqataasussaasut Ib Goldbacb aamma oqarpoq.