Inuussutissat akitsussapput

Nunarsuarmi inuussutissat akii ukiuni qaninnerni qaffangaatsiassapput, taama nittartakkamini allaaserisaqarpoq aviisi Politiken, nangillunilu Danmarkimi ilaqutariit sisamanik innuttallit inuussutissanut aningaasartuutigisartagaat ukiumut 46.000 koruuniniit 50.000 koruuninut qaffassasut.
Allattoq Mads Lynge
januaarip 14-at 2008 08:17

Inussutissat akitsornissaat ima tunngavilersorneqarpoq: Tamanna Australiami, Europallu kujataani kangianilu naatitsinerit ajutoornerisa kinguneriinnanngilaat, tassami aamma inuussutissanik piumasaqarnerulerneq aamma patsisaavoq. Kinamit inuussutissanik piumasaqarnerulernerup inuussutissat akitsortippai, Kinamiummi neqitorusulerput, nersussuullu neqaa kiilu ataaseq tunisassiariniaraanni taava karrit 8 kiilut nerukkaatissatut pisariaqarput.

Danmarkimi inuussutissat akitsornerat 2007-imi aasakkut pivoq. Aggustimiit immuk, immussuit manniillu 14 procentimik akitsorput. Iffiukkat karrinillu tunisassiat 10 procentimik akitsortut. Akitsuinerit ukiut tallimat arfineq-marlullu akornanni pisussaagaluit ukiup affaata ingerlanerinnaani pipput. Massakkullu aamma tassa timmissanik tunisassiorneq aamma akitsoriartorpoq, neqinillu tunisassiornerit aamma tassa 2008-mi malinnaassallutik, tassalu tamanna pivoq nerukkaatissanut akigititaasut nunarsuatsinni marloriaatinngorsimammata.

Kinaminngaanneersunik akikitsunik pisisarnitta Kinamiut pisuunnguutigimmassuk paasisariaqarparput, tamannalu massakkut inuussutissat akitsornerisigut malugilerparput, Kinamiummi manna unammilerpavut, Leif Nielsen Politikenip nittartagaanut oqarpoq.

Kalaallit Nunaanni Brugsenit pisortaat Olav Thomsen oqarpoq karrinit tunisassiat akitsungaatsiarsimasut iffiukkallu akitsorsinnaanissaat ilimagisariaqartoq, tamannalu annertunerusumik ullup qeqqanut radioaviisimi sammineqassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq