Inuussutissat Akilinermi akisuallaarnerarpaat
Inuussutissat avannaanut nassiussorneqarneri Naalakkersuisunit tapiiffigineqartaraluartut tamanna siorna ukiakkut atorunnaarsinneqarpoq, taamaliornerlu assuarineqangaatsiarpoq. Tapiisoqartarnerani inuussutissat akiisa akisuallaartannginnerannut tamanna pissutaasaraluarpoq. Tassalu aaqqissuussineq nutaaq ukioq manna aprilimi atuutilersinneqartussaq maanna aamma aallartissalluni.
Nutaamik aaqqissussineq taaneqarsimavoq Nutrition North-imik, ima nutserneqarsinnaalluni Avannaani nerisassat peqqinnartut.
Aaqqissuussinermi nutaami Naalakkersuisut nerisassanut peqqinnartunut taamaallaat tapiisassapput.
Saftit, imeruersaatit sukkullit aamma nerisassat peqqinnanngitsut akii appartinneqassanngillat sulilu akisuukasiussallutik. Immuilli akii appartinneqassapput naak kujasinnerusumut naleqqiullugit suli akisunerujussuussagaluartut.
Nerisassat peqqinnartut akiisa appartinneqarneri agguaqatigiissillugu 5 procentimiit 10 procentip tungaanut akikinnerulissapput.
Nunavimmili allatut qangali atuuttumik aaqqissuussisoqarsimavoq. Makivik Corporationip Kativimmi Naalakkersuisut aamma Inuit Air suleqatigalugit, assigiinngitsunik arfinilinnik Nunavimmiunut tapiisarput. Makivik Corporationimit Kitty Gordonip radioaviisimut oqaluttuaraa, pisiassat taperneqartartut ilaatigut tassaasut orsussaq benzin, piniarnermut sakkut nassiunneqarnerannut, qamuteralaat taakkununnga ilaallutik, ukiumullu marloriarluni timmisartumik angalanermut 75 procent tikillugu tapiisoqartarluni.
Inuussutissanut peqqinnartunut aamma naatitanut, Makivik Corporation 20 procent tikillugu taakkununnga tapiisarpoq, peqqinnanngitsunut tapiissanatik.
Inuussutissanut tapiisarnerit assigiinngitsut atorneqaraluartut taamaattoq inuussutissat suli akisuallaarujussuarput, tamannalu nunaqarfinni innuttaasunut artukkiisarluni.
