Inuussutissarsiutit siuarsarneqarnerinut aningaasaliissutit amerlanerusut

Atassutip Inatsisartunut ilaasortaatitaanut marluusunut, Siverth K. Heilmannimut Gerhardt Petersenimullu, paragraf 37 naapertorlugu akissuteqaammi taama allassimavoq.

Siunnersorteqarnermut tapiissutinut, aalisarnerup iluani tapiissutinut, piniarnermik nunalerinermillu inuussutissarsiutinut, nunaqarfinni isorliunerusunilu inuussutissarsiutitigut suliniutinut, allaallumi aviisit nuna tamakkerlugu saqqummersartut, 363 millionit koruunit tapiiffigineqassapput. Sermitsiap AG-llu saqqummersinneqartarnerinut 2,5 millionit koruuninik tapiiffigineqassallutik.

Aningaasanulli inatsisissatut siunnersuummi aningaasartorfiunerpaasussat tassaapput aalisarnermik inerisaanermi aningaasat agguaassassat, 45 millionit koruuninik aningaasartaqartut, aamma puisip amiinik tunisinermut tapiissutit aappagu 27 millionit koruuninik aningaasartaqartussat.

Nunalerinermut aamma tapiissuteqartoqassaaq, tassanilu aningaasaliinermut tapiissutissatut, 13 millionit koruunit immikkoortinneqarsimallutik.

Namminersorlutik Oqartussat assigiinngitsorpassuartigut pikkorissartitsisarnerat akileraartartunut, 30 millionit koruuninik naleqassaaq. Aammattaaq immikkut ittumik piginnaasanik ineriartortitsinermik pikkorissaanernut, 25 millionit koruunit immikkoortinneqarsimallutik.

Peqatigisaanik aamma nunami inuussutissarsiutinut takornariartitsinermullu tapiissutissatut, 31 millionit koruunit immikkoortinneqarsimapput. Suliffissaaleqinerup immikkut ittumik suliniuteqarfiginissaanut, 20 millionit koruunit missaasa atorneqarnissaat missiliorneqarpoq. Piareersarfiillu ingerlanneqarnerinut, 44 millionit koruunit atorneqassallutik.

Nunaqarfiit siunissaat pillugu, sapaatip-akunnerata naanerani isumasioqatigiinnermi, oqaluuserineqartunut tunngatillugu nunaqarfinni isorliunerusunilu immikkut ittumik sanaartornissamut periusissamut, 18 millionit koruunit missaat immikkoortinneqarsimapput. Eqqumiiginarsinnaasutullu eqqaaneqarsinnaavoq, Alcoap suliniutaa nunatta karsianut ukioq manna 6,6 millionit koruuninik aningaasartuutigineqassammat, aappaagulu 9 millionit koruuninik aningaasartuutigineqartussatutu naatsorsuutigineqarluni. Aningaasanut inatsisissatut siunnersuummi aamma piginnaanngorsaqqiinermut 9 millionit koruuninik immikkoortitsisoqarsimavoq.

Naalakkersuisut taamaasillutik 363 millionit koruunit inuussutissarsiutinut tunngasunut aappaagu atornialersaarpaat.